Ich Hainrich vnder den Pengchen ¹⁾ purger ze Chiczpühel vnd ich Elspet sein Hausfraw vnd ich Hainrich der Grünager. vnd ich Anna ir Tochter wir vergehen für vns vnd für all vnser Erben. Daz wir mit gütem willen vnd mit verdachtem müt vnd ze der zeit da wir Ez wol getun machten. Durich vnser vnd aller vnsern vodern Sel willen. geben vnd bestaet haben. Sand Andres Goczhaus ze Chiczpühel Vnser Güt ze Oberndorf daz leit ze Niderist Ein dem selben Dorff. Ein Chiczpühler gericht. für ledigs vnd freies aigen mit allen Eren Rechten vnd nützen die dar zü gehörent oder da von bechom mügen wie die genant sind besucht vnd vnbesucht vnd als wir ez von den Velbern chaufft haben. Also mit der beschaiden vnd mit dem geding, wer ze ie der zeit dez selben Goczhaus Chirichprobst ist. vns Ewichleich vnd allen vnsern vodern all iar vor sand Marteins tag. vierczehen tag. Aynen iartag begen schol mit Fümf priestern. vnd da schol man von geben dem pharrer vierczehen chräuczer vnd dem gesellen ze Chiczpühel zehen chräuczer vnd dem Chaplan acht chräuczer vnd dem gesellen von sand Iohans chirichen acht chräuczer vnd wer mer von ainem priester chom auch acht chräuczer. Ez schol auch der gesell ze Chiczpühel all iar an dem Iartag dez Abencz ain Vigilig singen. vnd da schol man im besunder von geben zehen chräuczer vnd dem Schulmaister vier chräuczer vnd dem Mesner vier chräuczer. Ez schol auch der gesell ir gedachtnuzz haben all Suntag auf der Chanczel. Man schol auch all iar an dem Iartag geben Siben phunt perner vmb pröt vnd vmb Ches arm lauten. Man schol auch all iar von dem güt geben. Drei schilling phenning halb hincz vnser frawn gen sand Iohans Chirichen vnd halb hincz sand Andre gen Chiczpüchel. vnd zwai phunt wachs ains hincz sand Giligen ein daz Räut ²⁾ vnd ainez gen Awraw. ³⁾ waz dar nach der gült von dem güt vber wurd daz schol man geben aim hausarm vmb gewant. all iar. vnd den iartag vnd daz geschafft schol der Chirichprobst handeln vnd volfüren all iar nach vnser nachsten zwager frumt Rat. waer aber daz Ez absturb so schol er ez tün nach der purger Rat wer ie ze der zeit dez Racz sind den wir ez enphelhen mit samt dem Chirichprost hincz iren treun. Ez schol auch dem Chirichprobst geuallen all iar von dem güt die weisat oder Sechs chräuczer von seiner mü. Ez schol auch Partel der Welifshouer der ainer sein nach dez Rat Ez gehandelt schol werden die weil er lebent. Dez ze Vrchund geben wir dem vorgenanten Goczhaus den prief versigelt mit der purger ze Chiczpühel anhangendem insigel in an schaden. Dez sind zeug Herr Ortolf ze der zeit Vicari ze sand Iohanschirichen. Hainrich der Merkinger. Fridreich der Prämel. Peter Grametsch. Hainreich der Puchler vnd ander Erber läut genüg. Datum Anno Domini M ^o ccc lx Nono in die Sancti Galli.

Source Fulltext: DOPPLER