Ich Wilhalm Chunrats des Schreiber sun von Wazzerburch vnd ich Wandel sein Hausfraw Wir vergehen für vns vnd für all vnser erben Daz wir mit guetem willen vnd nach erberger lewt Rat chaufleich zechauffen geben haben Bartholomen dem Swab purger ze Chitzpühel Chuenrat Ruedlanten purger do selben ir paider hausfrawn vnd allen iren erben vnser guet ze Oberndorf, Daz weilent gewesen ist der Senckhofer vnd da der Schraipühler auf gesezzen ist mit allen mit ästen ¹⁾ Dar zue mit allen den eren rechten vnd nützen di dar zue gehörend oder da von bechomen mügen wie die genant sint besuecht vnd vnbesuecht für ein ledigz guet, vnd als wir ez zelehen gehabt haben von herren Hainrich von Velben dem got genad vmb vier vnd zwaintzig March Meraner münzz vnd sechs pfunt perner der wir von in gar vnd gantz verricht vnd gewert sein wir vnd vnser erben schüllen des vorgenanten guets ir vnd aller irr erben recht gewer sein an aller stat wo in des nöt beschicht als des lands do ez inn leit vnd rechts lehens recht ist Taet wir des nicht nämen si des chainen schaden wie der genant wär oder wie si den nämen den schüllen wir in ab tuen vnberedt vnd vnberecht ir ains trewen vnd worten dar vmb zegelauben an ayd vngesworn, vnd schüllen daz allez haben auf vnsern trewen vnd dar zue auf aller vnser hab wo wir die haben oder wie die genant ist biz auf volliv gantziv werung hawbtguets vnd schadens, Vnd haben in auch daz selb guet auf gesant pey Lienharten dem Altpecken an den herren, wer des vorgenanten hainrich des Velber lehen leihent wirt in zeleihen als lehens recht ist Dez ze vrchünd geben wir in den brief versigelt mit vnserm aygen hangenden Insigel, Dez sind zewg Hainrich Meylinger Thoman Perchaimer Peter Gramätsch Michel TalRewtter, Ott Karel vnd anderr erberg Lewt genug, Datum anno domini M ^o ccc ^o lxx ^o In die sancte scholastice virginis.

Source Fulltext: DOPPLER