Ich Larencz der Slunt ze der zeit Richter ze Chiczpühel, vnd ich Elspet. sein Hausfraew wier vergehen für vns vnd für all vnser Erben. Daz wier mit guetem willen vnd nach Erber laeut Rat. Chaeufleich haben ze Chaeuffen geben Hainrich dem Vogchen purger ze Chitzpühel, seiner Haeusfraeun vnd allen ieren Erben vnser Guet ze Wisenswanch ¹⁾ da Hainrich der Weber aeuf Siczt mit allen Eren Rechten vnd nüczen die darzue gehorend oder da von bechom mügen wie die genant sint besucht vnd vnbesucht für ein ledigs guet vmb zwaynczich phunt phennyng ie ainen chraeuczer für drei phenning der wier von in dar vmb gericht vnd gewert sein gar vnd gancz vnd schullen wier dez selben guecz ier gewer sein wa in des nöt geschicht. als dez landes da ez in leit vnd lehens Recht ist. Taet wir dez nicht naemen Si des chainen schaden wie der genant wer den schullen wier in ab tuen vnberet vnd vngesworen vnd schullen Si daz haben aeuf vnsern treun vnd dar zue auf aller vnser hab wa wir die haben. Wir haben in auch daz selb guet aeuf gesant an die Fraeunberger. da von wir Ez ze lehen gehabet haben in ze leichen als lehens Recht ist vnd schullen in daz gen den Fraeunbergern aeuz tragen an ieren schaden Dez ze vrchund geben wier in den prief versigelt mit vnserm aigen anhangendem insigel. Dez sind zeug Hainrich der Meilinger Chuenrat Rudlant Hans ab dem Pühel vnd ander Erber laeut genueg. Datum Anno domini M ^o CCC ^o lxx in Anunciacione beate virginis Marie.

Source Fulltext: DOPPLER