Ich Ott von Münichawe. vnd mein hausfrawe Sophei. vergehen für vns vnd für vnser erben offenleichen an disem brief vnd tuon chunt allen den die in ansechent oder hörent lesen. Daz wir mit guotem willen vnd mit verdachtem mvot, aufgeben haben. sant andren, vnd allen den heiliden die in dem Gotezhaus rastent ze Chiczpüchel. ain halbes phunt Müncher phenning jaerchleichcz dienstez. auf dem Guot ze Gruob; ¹⁾ daz gelegen ist bei dem walsenpache. vnd ist etswanen gewesen der Rötinne, do ich Ott der Münchawer ez von gechauft han. also daz daz vorgnant gotezhaus. dacz Chiczpüchel. die vorgnanten phenning sol haben jaeirleichen auf dem vorgnanten guot ze sant Michels tage. wanne dez nicht geschaeich. so hat der chirchprost. der hevt ist, oder noch wiert, alle sein nach chomen. die dez vorgnanten Gotezhauss phleger werdent, oder sint. gewalt ze phenten auf dem vorgnanten Guot, vmb die vorgnanten phenninge. als anderr Goteshaüser reht ist. vnd dez Landez Recht. vmb rechten dienst. vnd haben auch dem vorgnanten Gotezhauss. die vorgnanten phenning jaeirleichen gegeben, für rechtes freiez aigen. vnd für ain ledigez aygen. vnd haben daz getan durch meines Otten des Münchawer. vodrew hausfrawen margreten. der God genad, sael, vnd durch vnserr vodern sael. willen. vnd durch vnser sel willen. vnd doch mit sogtanen geding. swer dez vorgnanten gotezhauss chirchprost ist, oder noch wiert. dem vorgnanten Gotezhauss die vorgnanten phenning sol aein nemen. vnd sol dev chercze dev da hangt vor vnsers herren marter. ob dem vodern alter. da von haben. vnd prennen ewichleichen, vnd sol nimmer ab gen. vncz an den jungisten Tage. vnd dar vber ze ainem vrchünde daz ez dem vorgnanten Gotezhause staet vnd vnzebrochen beleiwe. von vns vnd von allen vnsernn erben. an allez gevaer. geb wier im diesen brief. versigelt vnd vervestent Mit meinem otten dez vorgnanten Münichawer hangenten jnsigel. dez sint gezevch. her Fridreich der vreithof. hainreich der swab. Fridreich der Seraevtaer. hainreich der arczet von chirchtorf. chuonrad von maurach. vlreich der herringer. der ze der selben zeit chirchprobst ist gewesen. vnd ander erbaer laevt genuoch. der Prief ist geben ze Chiczpüchel. do man zalt von vnsers herren Geburtt drevzechen hundert jar vnd darnach in dem dreizzigisten jar. an sant juliane tach.

Source Fulltext: DOPPLER