Ich Otto von Felben uergich offnlichen an disem brief allen den die in ansehen oder horent lesen. daz ich mit gutm willen und mit uerdachtm mut durch meines vater sel willen vnd aller vnser vodern sel vnser vravn Gotshavs ze Stuluelden da aller vnser vodern begrebnuß ist allez daz gescheft daz mein vater dem got gnad Herr Gebhart uon Felben¹⁾ und alle vnser vodern geschaft vnd gemaint habent dem uorgnantem gotshavs ze Stuluelden vnd den pharreren di da sint ze mezzen vnd inn zehaben ich vnd allem mein geswistried stetigen vnd ewigen vnd haben vns sein lavterleich vnd durchslechs verzigen vnd alle vnser erben Des ersten dew Swaig ze Gaukenpühel in der Felben mit allen den rechtn vnd nutzen die darzu gehorent besucht und vnbesucht di mein seliger vater auch bei seinem lebentigem leib geschaft vnd gemaint hat dem uorgeschriben gotshavs. Daz gut ze Stuluelden daz mein muter vraw Agnes der got gnad geschaft hat auch dem selben gotshavs daz man vf vnser vravn alter alle Samztag ein meß hab von vnser vravn. Daz gut vf dem Chirchperg bei Stuluelden daz auch mein seliger vater geschaft und gemaint hat mit guter gwizzen dem vorgeschriben gotshavs mit allen den rechtn vnd nutzen besucht vnd vnbesucht di dar zu gehorent vnd ist daz vorgnant gescheft vnd allez vnser vodern gescheft daz das egnant goshavs inn hat mit nutz vnd gewer mit freyer stift vnd gantzer geantwrt vnd fullen auch ich vnd allew mein geswistried des vorgnanten gotshavs herren vnd geweren sein an aller der stat vnd im des durft geschicht mit solher beschaidenhait swer pharrer ze Stuluelden ist daz der sol all Montag ein meß haben vf Sant Bartholomevs alter. der vnser vodern stift ist vnd alle phinztag auch vf dem selben alter auch ein messe haben wand dew selb meß ward mir vnd meim gewistrieiden uerhaizzen von Herrn Heinrich der ze der selben zeit pharrer was. uon im vnd uon seinen nachchomen ewichleichen ze behaltn dar vmb daz ich vnd Ekk mein bruder vnd all mein geswistrieid vnd all vnser erben besunderbar vns des uorgnanten Chirchperges vnd alles geschefts als uor geschriben stet dester willichleicher verzigen. Des sint gezeugen Herr Fridreich der Frithof²⁾ Ch. der Dewer Richter ze Chufstain vnd sein bruder Iohans. Ch. der Swainpech Andre der Seinchofer Fridreich der Hesler vnd ander erberiger lavt genuch Daz im das stet vnd vnzebrochen beleib gib ich im diesen brief versigelt mit meinem Insigel. Daz ist geschehen ze Chitzpuhel da man zalt uon Christes geburd Tausend Iar drewhundert Iar. vnd nach in dem Nevn vnd zwaintzigisten Iar an Sant Thomas Abent.

Source Fulltext: DOPPLER