Ich Frawe wendel Hainrichs ¹⁾ hausfrawe von parm vergich für mich vnd für mein sün Iorgen vnd hansen vnd für all mein erben offenbar an disem prief vnd tuon Chunt allen den die in an Sehent oder horent lesen. daz ich mit guotem willen vnd mit verdachtem muot durch meins wiertez Sel willen geben vnd geschaft vnd gemacht han auf daz gotzhaus datz Sant Andren ze Chytzpühel ewicleichen in daz liecht tzwen vnd dreizzich phenning geltz auf dem halben tzehent haus ze praitenperch auf meinem tail vnd auch mit sogetaner weschaidenhait. wer daz Selb tzehent haus inn hab daz der all jar jaercleichen da von geben schol tzwen vnd dreizzinch phenning Municher phenning oder als vil chorns als die phenning getragen mugen. Ich vergich auch mer. daz ich daz vorgenant tzehenthaus indert verchauffen oder versetzen oder verchumbern müst. daz schol daz selb gotzhaus an seinem gelt vngolten sein. vnd waer daz. daz vorgenant gotzhaus dez vorgenanten geltz nicht wechömen möcht auf dem vorgenanten tzechenthaus ain Iar oder tzwai oder mer daz waer von schaur oder von pyses ²⁾ oder von swelicherlay vngelükch daz waer. So schol daz selb gotzhaus der vorgenanten phenning wechömmen hin nach dez naechsten Iars vnd iz werden mag. vntz daz iz gar vnd gaentzleich der vorgescriben phenning gewert werd. vnd tzu ainem vrchunt der warhait daz dem gotzhaus die vorgescriben taidinch stet vnd vnzerbrochen beleib an allez gevaer von mier vnd von meinen Erben Geb wier im disen offen prief versigelten mit Herr vasoltz anhangenten Insigel im an schaden. da verpint wier vns vnder als wier vorgescriben sten pei vnsern treun wan wier an gevaer aygens Insigels nicht enhaben. Der taidinch sint tzeug herr vlreich pharrer ze sant Iohans Kyrichen. vnd herr Chunrat pharrer ze Kyrichdorf. vnd herr Chunrat der Beuthaimer. herr hainrich ³⁾ von lauffen. vnd herr hainrich der Beynhart vnd hainrich aus dem Greut. vnd hainrich der Oechsenperger. vnd ander erberg laeut genueg. daz ist geschehen ze Chytzpühel do man tzalt´ von Christes gepurd dreutzehen hundert jar dar nach in dem Sechsvnd dreizzigisten jar dez naechsten mittagz vor sand Iörgen tag.

Source Fulltext: DOPPLER