Ich Andre der Senchhover vergich für mich vnd für mein havsfrawen vnd für all mein Erben offenleich an disem brief. vnd tuon chund allen den die in an Sehent oder Hörent lezen daz ich mit guotem willen vnd mit verdachtem muot vnd ze der zeit vnd ze der weil do ich ez wol getuen maht vnd auch pylleich tet. geben vnd geschaft vnd gemaht han. auf meins hern Sant Andres gotzhavs ze Chytzpühel meinen halben garten der gelegen ist in dem marchkt veld an dem graben. mit sotaner beschaidenhait daz in mein Havsfrawe inn sol haben vnd Schol Si all Iar da von geben fümf Müncher phfenninge ze vrchund. vnd ob daz wer das mein Havsfrawe hinn sturbe oder in dem marchkt nicht Sesse So ist der vorgeschriben halb garten loz vnd ledig gar vnd gentzleich von mir vnd von meiner havsfrawen vnd von allen meinen Erben vnd ze ainem vrchund der warhait. daz dem vorgeschriben gotzhavz daz stet vnd vnzerbrohen beleib an gever gib ich in disen offen brief versigelt mit meinem anhangenden Insigel Der tayding sint zevg her Fridrich der vreithof Fridrich der.... ¹⁾ Dyetreich der Sneider. Der brief ist geben ze Chitzpühel do man zalt von Christes gepurt drevzechen hundert Iar vnd da nach in dem Sechz vnd dreyssigisten Iar dez montags vor Sant Margreten tag.

Source Fulltext: DOPPLER