Ich Andre der Greswein vergich für mich vnd all mein Erben Daz ich liepleich vnd freuntleich vericht vnd vertaidingt pin nach friunt vnd ander Erber laeut Rat mit meinem lieben Swager Erharten dem Chaelslein vnd mit seiner Hausfraeun Diemueten meiner muemen. Vmb daz heirat Guet da si meiner vodern prief vmb gehabt haben. Daz ist also getaidingt Daz in vnd ieren Erben volgen schol. Daz halb guet ze Pflüsperch. daz leit ein Chitzpüchler gericht als ez von Alter mit Tail herchom ist vnd als ez mein vodern vnd ich ingehabt haben Für ein ledigs guet. vnd mügen hin für mit dem selben guet iren frum schaffen mit verchaeuffen oder an ier not durfft legen oder handeln wie Si mügent oder wellent. an mein wider Red vnd verczeich mich dez selben halben guecz gen in vnd gen allen iren Erben daz ich vnd mein Erben chain ansprach noch vodrung darauf haben noch gewinnen schullen mit Recht noch an Recht noch mit chainen sachen Ze einer vrchund verpind ich mich vnder dez Goczhauß von Pabenberch insigel. da von ez lehen ist dem Goczhaus vnd dem Amptman an schaden. Dez sind zeug. Larencz der Slunt. Paertel der Swab. Lienhart Altpegch vnd ander erber laeut genueg. Datum Anno domini M ^o CCC. LX. Septimo in die beati Alexi.

Source Fulltext: DOPPLER