Ich Hainrich Staierperger vnd ich Nicla der Grametsch vnd vnser paider Haeusfraeun. Wir vergehen für vns vnd all vnser Eriben. Vmb die Mül ze Grueb vnd vmb daz Paew daz dar zue gehört. die wier ze Eribrecht bestanden haben von herren Vlreichen Arnolcz Sun purger ze Chiczpühel dem got genad ze den zeiten Vicari dacz Zell in dem Zilerstal. als der prief sagt den wier von iem dar vmb haben. Daz wier im daz vorgenant Guet vnd die Mül oder wer daz mit seinem gueten willen in hat. verdienen schullen all iar auf sand Michels tag mit zehen phunt perner Meraner münzz. vnd den haeligen sand Andres goczhaeus ze Chiczpühel vierczich Chraeuczer. vnd schullen auch all iar ein ier Stifft chom vnd ez von im emphahen als Rechcz freicz Aigens Recht ist. vnd schullen in die Mül vnd daz guet wesenleich vnd paeuleich legen. an wazzer gang an würen an stainen vnd an zymer. an dach an zaeunen vnd an allen sachen vnd ob wier dez nicht taeten. so schullen wier paidenthalb vier Erber man dar zue nemen. vmb we wier mit im dar vmb ze chrieg chomen ez wer mit Recht oder an Recht. die ez wol erchenen chünen Auf ietwedern tail zwen vnd mügen die gesprechen pei iern treun daz ez nicht wesenleich lig, an geuer So sein wier gestanden von allen vnsern Rechten vnd waz er dez schaden naem mit Gaistleichem oder mit weltleichen Rechten. den schullen wier im ab tuen gar vnd gancz vnd den schol er haben auf vns auf vnsern Eriben vnd auf aller vnser hab wa wier die haben vnd waz wier mit im dar vmb Rechten oder chriegen wolten Gaistleich oder weltleich daz schol er allez gewun haben vnd wier verloren Dez ze vrchund geben wier im den prief versigelt mit Niclas dez Münichaewer insigel der ez an den prief gehengt hat durich vnser pet willen im an schaden. dez sind zeug Paertel der Swab Ott charel Hainrich Grametsch vnd ander Erber Laeut genüg. Datum Anno domini M ^o CCC lxx Tercio in die beati Galli.

Source Fulltext: DOPPLER