Ich Vlreich Arnolcz Sun purger ze Chitzpühel dem got genad zu den zeiten Vicari dacz Zell ein dem Zilerstal. vergich mit dem prief Daz ich mit guetem willen vnd nach erber laeut Rat. lazzen han. Chuenraten von Sünesperch. ¹⁾ vnd Niclan dem Grametschen ier paider hausfraeun vnd allen ieren Eriben mein guet ze Grueb ²⁾ daz ich von Eberharten dem halabrugker chaufft han. vnd die Mül die dar zue gehört. daz mein Rechcz Aigen ist besuecht vnd vnbesuecht mit allen nüczen vnd Rechten die dar zue gehörent ze Rechter Eribschafft ein der beschaiden daz sie oder ier erben mier oder wer daz guet von meinen wegen in hat vnd die Mül iaerichleich ie ze sand Michels tag da von ze dienst geben schullen zehen phunt perner Meraner Münzz. vnd den haeligen Sand Andres goczhaeus ze Chiczpühel vierczich chraewczer. ³⁾ Si schullen auch all iar ein mein Stifft chomen. vnd daz guet vnd die Mül enphahen vnd paeuleich vnd wesenleich legen an allen sachen. vnd schol ich dez selben guetes vnd der Mül ier herr vnd gewer sein als dez lancz vnd paeumans Recht ist Taet ich dez nicht. welhen schaden si dez nement. den schullen Si haben auf mir vnd auf aller meiner hab dez ze vrchund gib ich in den prief versigelt mit meinem aigen anhangendem insigel Datum Anno domini M ^o ccc ^o lxx ^o Tercio in die beati Galli.

Source Fulltext: DOPPLER