Ich Iorig der Teis vnd ich Fridreich der Schorn von Haws vnd vnser paider Hausvrawen vnd all vnser paider eriben wie die genant sein wir veriehen offenbar an dem prieff vnd tuen chünd allen den di in ansehend oder horend lesen. daz wir mit wolbedachtem muet vnd mit willen vnd gunst vnd rat vnser naechsten pesten vrewnt vnversprochenlich ze chauffen haben geben vnser chraut Gaerten vnd vnser pewnt. die gelegen sind ze Rastat pei dem nidern tor oberhalben der siechen haws dem erbern mann Echkarten dem Sneider in der lachen puriger ze Rastat vnd seiner hawsvrawn vnd allen ieren eriben vnd habent si vns di chraut Gaerten vnd die pewnt gar vnd gancz vergolten nach allem vnserm willen vnd an allen vnsern schaden wand wir vnd vnser eriben vns der chrautgaerten vnd der pewnt die rechts purchkrecht sind ewichleich verzeihen vnd verzigen haben also daz wir vnd all vnser eriben vnd frewnt chain ansprach noch recht nimmer mer dar nach schullen gehaben mit recht noch an recht haimleich noch offenleich noch mit chainerlay sach angeuer wir loben in auch mit vnsern trewn an aides stat der vorgenanten chrautgaerten vnd der pewnt ir gewer vnd furstand sein fur aln chrieg vnd ansprach an aller der stat wo in des not und durft geschicht als purchkrechts recht ist vnd der stat ze Rastat vnd schullen si daz haben auf vns vnd auf vnsern trewn vnd da zue auf aller vnser hab wo wir di haben oder wie die genant ist inner lands oder auzzer lands besuecht vnd vnbesuecht vnuerschaidenleich vnd daz in daz als staet vnd vnzebrochen von vns beleib dar vber geben wir in den vnsern offen prieff versigelt mit des erbern mans Hansen des Poczzenfurter ze der zeit amtman ze Rastat. aigem anhangentem insigel im an allen schaden war wir in vleizzleich dar vmb gepeten haben vnd verpint wir vns dar vnter mit vnsern trewn als daz stat ze haben vnd verpint wir vns dar vnter mit vnsern trewn als daz stat ze haben waz oben an dem prieff geschriben ist. Der prieff ist geben nach Christes gepurd Drewzehen hundert Iar dar nach in dem vier vnd sibenzigistem Iahr an Sand Vlreichs tag.

Source Fulltext: DOPPLER