Ich Chunrat Rudlant vnd mein Haeusfraew Wier vergehen für vns vnd für all vnser Eriben. Daz wier mit guetem willen geben haben vnser Guet daz genannt ist ein der Hucelgazz vnd leit zu Lengdorf ein Mittersiler Gericht mit allen eren Rechten vnd nüczen die dar zue gehörent. wie die genant sind für ein ledigs vnd freiez Aigen Ein daz liecht. daz prinnet vor den Totenpain dacz sand Andres Goczhaeus ze Chitzpühel. vnd haben daz halbes geben durich vnser vödern vnd aller gelaubigen Sel willen vmb den andern halben tail haben wir enphang vnd ein genom. Dreizzich phunt Meraner münzz vnd schullen wier dez selben guecz dez Goczhaeus ein daz vorgenant Liecht Recht gewer sein als dez Landez da Es in leit vnd Rechcz Aigens Recht ist Taet wier dez nicht. welich schad dem vorgenant goczhaeus dar auf gieng den schullen die pharlaeut vnd daz goczhaeus haben auf aller vnser hab Ez schol auch der Chirichprobst. wer des vorgenanten Liechcz phleger ist. daz vorgenant guet all zeit Stifften nach meinen vorgenanten chuenrat Rudlancz Rat die weil ich leb. vnd waz die stifft oder die gult von dem selben guet pryngt. die schol ein daz liecht all zeit volgen vnd gen an all wider Red. Dez ze vrchunt geben wier dem Offt genanten goczhaeus den prief versigelt mit Nicklas dez Münichaewer anhangendem Insigel im an schaden. Dez sind zeug Hainrich Meilinger Paertl der Swab. Hainrich Chaczman vnd ander Erber Laeut genueg. Datum Anno domini M ^o ccc ^o. lxx. Quinto in die beate Dorothe virginis.

Source Fulltext: DOPPLER