Ich Nicla Schaflüczel. und ich Diemuet sein Haewsfraew. Wir vergehen für vns vnd für all vnser Eriben. Daz wier mit guetem willen vnd nach Erbern Laewt Rat Chaeufleich haben ze chaeuffen geben Sand Andres Goczhaeus ze Chiczpühel vnd den Pharlaeuten dez selben Goczhaeuss. vnser Haeus vnd hofstat halbez daz Leit ein dem Marcht ze Chiczpühel. mit allen nüczen vnd Rechten für ein Ledigs haeus vmb Sechczehen March chraeuczer Meraner münzz der wier von inn dar umb gericht vnd gewert sein gar vnd gancz. vnd schullen wier dez selben halben haeuss gewer sein als des Marichcz ze Chiczpühel vnd Aygens Recht ist Taet wier dez nicht welhen schaden dez daz vorgenant goczhaeus und die pharlaeut naemen wie der genant wer den schullen wier in ab tuen vnberet ir ains treun vnd worten ze gelaeuben an aid vnd schullen Si daz allez haben aeuf vnsern treun vnd dar zue aeuf aller vnser hab wa wier die haben oder wie die genant ist Ich vorgenant Diemuet verczeich mich aeuf dem selben halben haeus Morgengab Haimstewer widerleg vnd aller Ansprach als sich en Fraew durich Recht verczeichen schol vnd dez ze vrchunt geben wier dem offt genanten Goczhaeus vnd den Pharlaeuten den prief versigelt, mit Niclas dez Münichaewer anhangendem Insigel im an schaden Dez sind zeug Wernhart Münichaewer Lienhart der Altpegch Hainrich Meilinger vnd ander Erber Laewt genueg. Datum Anno domini M ^o ccc. lxx. quinto in die beati Vrbani.

Source Fulltext: DOPPLER