Calixtus episcopus servus servorum dei dilectis filiis Hermahno abbati et canonicis in episcopali ecclesia sancti Roberti Salzburgensi regularem vitam professis tam presentibus quam futuris in perpetuum. Austri terram inhabitantibus per prophetam dominus precipit, cum panibus occurrere fugienti. Idcirco vos filii karissimi de seculo fugientes gratanter excipimus et per sancti spiritus gratiam sedis apostolicie munimine confovemus. Vite namque canonice ordinem qui per dilectissimum fratrem nostrum Chonradum Salzburgensem archiepiscopum in vestra est ecclesia institutus, presentis privilegii pagina confirmamus. Statuimus enim, ut nulli omnino hominum liceat eundem ordinem in vestra ecclesia immutare et ne cui vestrum post professionem exhibitam proprium quid habere neve sine abbatis vel congregationis licentia claustri cohabitationem deserere liceat interdicimus et tam vos quam vestra omnia sedis apostolice protectione munimus. Vobis itaque vestrisque successoribus in eadem religione mansuris ea omnia perpetuo possidenda sancimus que inpresentiarum pro conmunis victus sustentatione legitime possidere videmini et quecumque deinceps canonice poteritis adipisci. Ad hec decernimus, ut nulli hominum facultas sit vestram ecclesiam temere perturbare aut eius possessiones auferre^a) vel ablatas retinere minuere vel temerariis vexationibus fatigare, sed omnia integra conserventur eorum pro quorum sustentatione et gubernatione concessa sunt usibus omnimodis profutura, salva metropolitani proprii reverentia. Ad hec adicientes statuimus, ut obeunte ipsius loci abbate nullus in abbatem qualibet surreptionis astutia seu violentia preponatur, nisi quem fratres communi consensu vel fratrum pars consilii sanioris secundum dei timorem providerint regulariter eligendum. Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit, secundo terciove commonita si non satisfactione congrua emendaverit, potestatis honorisque sui dignitate careat^b) reamque se divino iuditio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Iesu Christi aliena fiat atque in extremo examine districte ultioni subiaceat; cunctis autem eidem loco iusta servantibus sit pax domini nostri Iesu Christi, quatenus et hic fructum bone actionis percipiant et apud districtum iudicem premia eterne pacis inveniant. Amen, amen, amen.||
R^c) Ego Calixtus katholice ecclesie episcopus ss. M^d)||
Dat. Laterani per manum Hvgonis sancte Romane ecclesie subdiaconi, XI⁰ kal. martii, indict. I^a, incarnationis dominice anno M°C °XXIII⁰, pontificatus autem domni Calixti II pape anno V^o.||
B^e)||

Source Fulltext: Salzburger Urkundenbuch, II. Band, Urkunden von 790 bis 1199. Willibald Hauthaler und Franz Martin. S. 195-197.