Honorius episcopus servus servorum dei dilecto filio Herimanno abbati et canonicis in episcopali sede sancti Rodberti Salzburgensi regularem vitam professis tam presentibus quam futuris in perpetuum.^a) Ad hoc universalis ecclesiae cura nobis a provisore omnium bonorum deo commissa est, ut religiosas diligamus personas et bene placentem deo religionem studeamus modis omnibus propagare; nec enim deo gratus aliquando famulatus impenditur, nisi ex caritatis radice procedens a puritate religionis fuerit conservatus. Hoc nimirum caritatis intuitu dilectae^b) in domino fili Herimanne abbas interventu venerabilis fratris nostri Chonradi Salzburgensis archiepiscopi tuis rationabilibus postulationibus duximus annuendum, statuentes ut canonicus ordo iuxta beati Augustini regulam in vestra ecclesia ab eodem fratre nostro Chonrado archiepiscopo constitutus futuris perpetuo temporibus inviolabiliter observetur. Sane ne quis vestrum clericus vel laicus post professionem exhibitam proprium quid habere neve sine abbatis vel congregationis licentia claustri cohabitationem deserere audeat interdicimus et tam vos quam vestra onmia sedis apostolicae protectione munimus. Vobis itaque vestrisque successoribus in canonica religione mansuris ea omnia perpetuo possidenda sancimus quae inpresentiarum iuste et legitime possidetis sive in futurum largiente deo iustis modis poteritis adipisci. Ad hec decernimus, ut nulli omnino hominum facultas sit, vestram ecclesiam temere perturbare aut eius possessiones auferre vel ablatas retinere, minuere vel temerariis vexationibus fatigare, sed omnia integra conserventur eorum pro quorum sustentatione et gubernatione concessa sunt usibus omnimodis profutura, salva metropolitani proprii reverentia. * Obeunte vero te nunc eius loci abbate nullus in abbatem ibi qualibet surreptionis astutia seu violentia preponatur, sed quem fratres communi consensu vel fratrum pars consilii sanioris secundum dei timorem providerint regulariter oligendum. Si qua igitur in futurum ecclesiastica secularisve persona hanc nostrae constitutionis paginam sciens contra eam temere venire temptaverit, secundo tertiove commonita si non satisfactione congrua emendaverit, potestatis honorisque sui dignitate careat reamque se divino iuditio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Iesv Christi aliena fiat atquo in extremo examine districte ultioni subiaceat; cunctis autem eidem loco iusta servantibus sit pax domini nostri Iesv Christi, quatenus et hic fructum bonae actionis percipiant et apud districtum iudicem premia aeternae pacis inveniant. Amen, amen, amen.||
+ Ego^c) Honorius catholice aecclesiae episcopus ss. ||
Dat. Laterani II kal. maii.

Source Fulltext: Salzburger Urkundenbuch, II. Band, Urkunden von 790 bis 1199. Willibald Hauthaler und Franz Martin. S. 202-203.