Nos Fridericus dei gratia dux Austrie et Stirie ac dominus Carniole presenti scripto patere volumus universis, quod omnia bona, que Karolus de Gv/odrat bone memorie a Salzburgensi tenere debebat ecclesia, venerabilis dominus et amicus noster Eberhardus eiusdem ecclesie archiepiscopus ea suis heredibus duobus videlicet filiis plene contulit et remisit preter comitatum provincie apud Pongeu. Nos enim cum eodem domino et amico nostro archiepiscopo super eisdem heredibus convenimus in hanc formam, quod nobis Otto et frater suus Chvno Salzburgensi ecclesie deputetur, quem etiam Chvnonem in manibus nobilis viri Chunradi comitis de Hardeke tradidimus eo iure, quod sal vulgariter appellatur, ita quod eundem ecclesie Salzburgensi debeat assignare hac conditione interposita, quod si unus heredum decesserit predictorum, ad alterum nichilominus debita hereditatis portio devolvatur sive in nostra vel dicte ecclesie fuerit potestate, hoc etiam adiecto, quod heredes ipsius superstitis equaliter nobis et ipsi ecclesie dividantur. In huius itaque rei testimonium evidens et cautelam presentem litteram conscribi fecimus et sigillorum nostrorum munimine roborari. Actum in Frisaco, anno domini millesimo CC°XL°III°, III° kal. iulii, presentibus testibus dilecto domino et amico nostro Rvdegero episcopo Patauiensi, Heinrico venerabili episcopo Sekowensi, Ottone preposito Salzburgensi, Chvnrado comite de Hardeke, Wernhardo de Schowimberc, Heinrico pincerna de Hovgsbach, Ottone de Zlowenze, Hertnido de Petowe, Ottone de Missowe, Heinrico de Liehtenstein et aliis quam pluribus, quorum hic nomina non sunt scripta.||
S.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 563-564.