++ In nomine sancte et individue trinitatis. Eberhardus dei gratia Salzburgensis ecclesie archiepiscopus, apostolice sedis legatus, imperpetuum. ++ Pastoralis officii diligentia nos invitat ecclesiarum nobis subditarum intendere utilitatibus et honori, precipue cui specialiter sumus matrimonio colligati intendere specialius nos oportet. Nos igitur decorem domus dei in ea ampliare volentes et obsequium augmentare divinum secundum consuetudinem archiepiscopalium sedium de licentia sanctissimorum patrum nostrorum Innocentii tertii et Gregorii noni Romane sedis antistitum, qui utique de certa scientia ob nostre sedis excellentiam tanquam regularibus confirmarunt et de voluntate ac consensu capituli nostri in ecclesia nostra ordinavimus tres personatus subdecanatum scilicet, scolasticum et cantorem, ut in iuvenibus disciplina et in choro psallendi modus ipsorum providentia laudabiliter observetur, pro labore ipsorum singulis annis libras XII ordinantes equa portione singulis dividendas. Sed quia in omnibus ecclesiis Alamannie personatus subdecani minime reperitur, cum nos consuetudinem aliarum ecclesiarum imitari velimus, ex petitione capituli nostri subdecanatum remisimus, emolumentum, quod eidem dari consuevit, decano maiori assignari mandantes, cum labor ipsius ceterorum laboribus preferatur, qui utique frequentior est in ordine et officii sui debito corrigenda corrigit infirmiora queque fortius restaurando. Statuimus preterea, ut canonicis in capitulo locum et stallum in choro tenentibus cappe statuto tempore pelliciis subvestiantur agninis, que prius omnino simplices ferebantur, annis singulis ad hoc libras XII deputantes et in anniversario nostro VII libras similiter deputamus, ut ex eis IIIIor pro refectione fratrum karitative solvantur et tres alie pauperibus erogentur. Adicimus etiam, ut cum in adventu domini maiores antiphone „O sapientia" cum ceteris decantantur, ante canticum et post plenarie et sollempniter expleantur et duo ex maioribus signis ab inceptione ipsarum usque ad finem pro reverentia domini nostri Iesu Christi et sanctissimi sui adventus maiori tripudio compulsentur. Fratres quoque de septem libris tunc temporis in piscibus cottidie consolentur. Mandatum etiam trium pauperum, quod post publicam missam solet fieri, de libris quatuor volumus adimpleri. In loco insuper, quem ad nostram eligimus sepulturam, ubi altare in honore sancte et individue trinitatis et dei genitricis sanctissime est erectum, missam cottidie volumus celebrari. Ut autem hec omnia plene debeant adimpleri, ecclesias parrochiales in Gastvn et Talgaev capitulo nostro tradidimus pleno iure perpetuo possidendas institutionem ipsarum sine contradictione qualibet concedentes. Volumus autem, ut hec nostra donatio taliter perpetuo perseveret, quod qui pro tempore prepositus maioris ecclesie fuerit, in memoratis parrochiis nichil potestatis quantum ad executionem istorum sibi debeat usurpare, sed capitulum de communi consilio unum ex se eligat, cui iam dicte ecclesie pro receptione pensionum ipsarum, qui voluntatem nostram et institutiones in honoris sui periculum et dispendium sue salutis exequatur, fideliter commitantur, cui nomen oblaiarii imponatur. Mortuaria quoque, que a decedentibus eis accedere consueverunt, in suam recipiat potestatem, ut tam de his, quam de super habundantia ecclesiarum supradictarum pro voluntate fratrum consolationem aliquam, quam necesse duxerint, sine difficultate qualibet parciatur. Cum vero nimis sit asperum et bonis precipue moribus inimicum niti quempiam quantacumque rationis excusatione, que bene sunt ordinata, rescindere et exemplo docere ceteros sua quandoque posse constituta dissolvi, presentem paginam in evidens testimonium sigilli nostri iussimus munimine roborari, protectioni divine beatorum patronorum nostrorum Petri et Pauli apostolorum et sanctorum Rv/odberti atque Virgilii confessorum subicientes eandem conservatoribus eius benedictionem omnipotentis dei et gratiam exoptantes, violatoribus vero ipsius verbis vel factis excommunicationis vinculum imponentes. Dat. apud Salzburch, anno ab incarnatione domini M°CC°XLIII°, XIII kal. novembr., indictione prima. S.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 571-572.