+ Ebirhardus gratia dei Salzburgensis archiepiscopus, apostolice sedis legatus, omnibus Christi fidelibus salutem in perpetuum. Cum de gravibus dampnis et iniuriis capitulo Salzburgensi a comite palatino Rapotone de Craeiburc et suis multipliciter illatis idem capitulum ad protectionem sedis apostolice convolasset et eadem causa a domino apostolico venerabilibus viris videlicet abbatibus de Gaersten et Sitanstetin et preposito sancti Floriani fine canonico terminanda delegata fuisset, ipsi iudices pro cause cognitione partibus peremptorie citatis, dum dictus palatinus ad diem prefixum nec venisset nec idoneum pro se responsalem misisset, ipsum tamquam contumacem excommunicationis sententia innodarunt. Verum cum per executionem eiusdem sentantie homines sui cuiuscumque condicionis per totam Salzburgensem provinciam a divinis diutius essent suspensi, nos pastorali cura de salute animarum solliciti partes nostras pro amicabili conpositione interposuimus. Ad informationem igitur nostram pars utraque in arbitros conpromisit et pro conservatione arbitrii eorundem fidem in manus nostras obtulit incunctanter. Multa siquidem deliberatione hincinde habita tandem in subscriptam formam convenerunt, scilicet, quod palatinus de omnibus iniuriis capitulo in rebus mobilibus sive immobilibus a se ipso vel ab aliis suo nomine irrogatis secundum sententiam vel saltem arbitrium subscriptorum sex prudentum virorum, videlicet Vlrici decani de Bercheim, Cv/onradi plebani de Mv/eldorf, de ministerialibus vero ecclesie Heinrici de Hartschirchen, Marquardi de Bercheim, de ministerialibus palatini Wicpoti de Toerringen, Waltheri de Craieburc ante dominica palmarum ad diem prefixum absque omni contradictione plene satisfaceret hoc excepto, quod si palatinus fideli testimonio probare posset, quod prepositus dampnum in herbergariis ante diem, quo Hallarbrvcke in mense augusto convenerant, ecclesie illatum sibi remisisset super ipso non teneretur ulterius respondere. Quod si in probatione deficeret secundum arbitrium eorundem virorum satisfaceret, de dampnis vero a suis quocumque titulo cum contingentibus capitulo illatis similiter ad iudicium predictorum virorum plenam iusticiam exhiberet, hoc adhibito moderamine, ut si quando sepedicti sex viri convenire nequiverint, sententia convenientium et ad minus duorum robur obtineat firmitatis. Super eo vero, quod canonici conquerebantur se in transvectione victualium suorum iniusto pedagio apud Hallarbrucke gravari eidem exactioni palatinus tam in eundo quam in redeundo coram nobis in presentia subscriptorum testium renuntiavit. Quia vero malitia hominum prona est ad consueta recurrere, de futuris casibus sic statutum est, ut si capitulum vel ab ipso palatino vel a suis postmodum dampnificari contigerit, ad unum castrorum suorum dampni quantitate, quod est vicinius, prolata infra sex ebdomadas ad arbitrium quatuor de supradictis sex viris scilicet Cv/onradi de Mvldorf plebani, Heinrici de Hartschirchen, Marquardi de Bercheim, Waltheri de Craieburc de dampno suo capitulo satisfiat. Qui si omnes convenire nequiverint, tres aut duo factum nichilominus exequantur. Palatinus vero si formam huius conpositionis observare noluerit et secundum eam tam de preteritis quam de futuris satisfacere neglexerit, statim ipso iure sit excommunicatus ordine iudiciario pretermisso. Ut autem hec in posterum firma permaneant, presens super eis scriptum sigilli nostri fecimus munimine roborari et^a), ut omnis cavillatio tollatur, de Gaersten, Sitanstetin abbatum et prepositi sancti Floriani iudicum super ipso negotio a sede apostolica delegatorum appendi voluimus cum subscriptione testium, qui conpositioni predicte interfuerunt: Rvdegerus episcopus Kiemensis, Cvnradus plebanus de Mvldorf, Heinricus comes de Ortenberch, Ebirhardus comes de Dornberch, Cv/onradus de Horbach; ministeriales ecclesie: Cv/onradus burcgravius, Cv/ono de Gv/otrat, Heinricus de Hartschirchen, Marquardus de Bercheim, Albertus de Nochstein, Rv/odegerus de Salvelden, Ecchehardus de Tanne, Heinricus de Toerringen, Cv/onradus de Steinchirchen, Heinricus de Trvtleichingen et frater suus Cvnradus, Cvnradus de Ehingen, Heinricus vicedominus, Cvnradus Banechar, Heinricus de Tanne, Heinricus Naegil, Sigehardus de Ovste et alii quam plures.||
SD.^b) SD. SD. SD.

Source Fulltext: Salzburger Urkundenbuch, III. Band. Urkunden von 1200 bis 1246. Willibald Hauthaler und Franz Martin. S. 204-205.