+ ++ In nomine sancte et individue trinitatis. Lodewicus dei gratia comes pala++tinus Rheni et dux Bauuarie omnibus Christi fidelibus salutem in perpetuum. Cum solitum sit et utile gesta causarum scripture testimonio confirmari, presenti pagina confitemur et protestamur, quod nos in causa, quam habuimus cum domino Eberhardo Salcepurgensi archiepiscopo super castro, quod edificare inceperamus iuxta Halle, et iuribus ibidem habendis et aliis, que inter nos fuerunt, arbitrio et consilio domini Chunradi venerabilis Ratisponensis episcopi et Rapotonis comitis palatini Bauuarie stare promisimus et obedire fide data et iuramento prestito nos obligantes, ut conpositionem ab eisdem nobis propositam haberemus ratam et absque dolo firmiter servaremus, Talem autem compositionem ab ipsis nobis esse propositam et communi consensu decoctam esse profitemur, quam sub iuramento prestito consensimus atque promisimus observare sicut tamen nostri quam aliorum sigilli appositione probatur. Que talis est: In civitate Hallensi et dominus archiepiscopus et dominus dux iure suo sicut sub duce Saxonie Heinrico et duce Bauuarie Ottone habitum est, libere fruatur, ita quod dominus dux tam ex una parte pontis quam ex alia comiciam libere habeat usque ad fluvium, qui dicitur Steinpah, et dominus archiepiscopus iure suo gaudeat sicut antecessores sui sub prenominatis ducibus habuerunt. Novum castrum et edificium destruatur et derelinquatur, nec illud nec aliud amodo edificetur ibidem a domino archiepiscopo vel suis successoribus vel a domino duce aut suis heredibus. Antiqua civitas in suo loco permaneat numquam transponenda. Navigium libere habeat in fluvio Sâle versus Hall sicut antiquitus est habitum. Thelonium dandum vel non dandum ab hominibus archiepiscopi in eo iure maneat, in quo fuit sub ducibus supradictis. De moneta Salzpurgensi, quando innovatur, iudici ducis due libere solvantur et monetarii Salzpurgenses in civitate Halle libere cambium faciant et non alii. Apud Gevrichingen pons reedificetur et questus inde habendus communiter dividatur nullique transitus prohibeatur. Strate libere pateant omnibus transeuntibus ita, quod nullus cogatur ire vel ad locum vel ad pontem nisi quo sibi placuerit. Homines de Altah in suo statu maneant, in quo fuerunt donec archiepiscopus in iure ipsos evincat vel per amiciciam ipsos obtineat. Dominus archiepiscopus habeat Vager et Halburc cum adtinentibus sicut hactenus habuit, nisi dominus dux^a) in iure vel per amiciciam evincat. Similiter dominus dux habeat Karlstein cum hiis, que comes Fridericus de Pilstein novissime noscitur in suis usibus reliquisse, donec dominus archiepiscopus ab eo evincat in iure vel per amiciciam obtineat. Dominus Rudegerus de Saluelden duci relinquat, si qua post obitum comitis sibi usurpavit, alia vero possideat in quiete. De dampnis vero hincinde iam illatis nulla questio moveatur. Si nova emerserint, de hiis vicissim iusticiam sibi faciant. Ad hec dominus archiepiscopus super privilegio¹⁾, quod dux pretendit, coram domino rege in proxima curia, quam celebrandam indixit, secundum iusticiam et principum sentenciam respondeat aut amicabiliter conponat. Verum si curia illa dilata fuerit ea tamen, que predicta sunt, in continenti effectu mandentur et rata teneantur et dominus archiepiscopus in alia proxima curia idem facere teneatur, dummodo sex septimanis ante sibi a domino duce vel a domino rege pronunciata fuerit, nisi aliter conmuni consensu inter se deliberaverint. Ista conposicio sicut prenotata est sub iuramento prestito firmiter observetur ita, quod nec a nobis nec a successoribus nostris nec ab archiepiscopo nec a successoribus suis aliquatenus infringatur.||
S.^a) S.^b) S.^c)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 252-253.