Cum nos Eberhardus archiepiscopus Salzpurgensis et Livpoldus dux Austrie super dampnis illatis a nobis vel a nostris ad invicem habuissemus plures mutuas questiones, de communi consensu taliter ordinavimus apud Wels, ut dominus Otto de Ror, dominus Albero de Pollenheim, dominus Syboto de Háge archiepiscopo ex parte ducis et purcravius Salzpurgensis, dominus Chunradus de Kalheim, dominus Gérhóhus de Percheim duci ex parte archiepiscopi super suis querimoniis sint iudices deputati, hoc acto^a), ut apud Vekelerpruke infra VI septimanas a die prime citationis numerandas quicquid eis propositum fuerit debeant expedire, exceptis dampnis, que a domino Ekehardo de Tanne vel a proscriptis vel a latronibus publicis inferuntur, de quibus alter alteri non faciet rationem, nisi forte ipsos in suis civitatibus, castris vel oppidis vel suorum ministerialium^b) tueatur. Si qui vero de iudicibus supradictis petentibus iusticiam non satisfecerint, quemadmodum est premissum, ille, qui eos ad hoc deputavit, dampna illata resarcire de proprio teneatur, adeo quod etiam ad satisfactionem cum aptis pignoribus possit et debeat coartari. Item dux ministerialibus et hominibus archiepiscopi venientibus ad placitum apud Vekerlerpruche in eundo et redeundo inter eundem locum et Strazwalhein super conductu et securitatibus providebit. Ut hec autem robur optineant firmitatis, presentem cartam conscribi fecimus et sigilli nostri munimine roborari.||
S.^c) S.^d)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 268-269.