Fridericus dei gratia Romanorum imperator semper augustus Ierusalem et Sicilie rex dilecto consanguineo et principi suo F(riderico) illustri Austrie et Stirie duci gratiam suam et omne bonum. Cum sententiam de questione regalium contra venerabilem Gurzensem episcopum et ecclesiam suam per inclite recordationis O(ttonem) IIII^{tum 1)} predecessorem nostrum pro Salzpurgensi ecclesia latam ac per dilectum filium nostrum H(einricum) Romanorum regem illustrem de principum consilio et assensu postmodum innovatam^{a) 2)}, nos eidem episcopo nostris dedimus litteris firmiter in mandatis, ut ipsi parere sententie non postponat dilecto principi nostro venerabili Salzpurgensi archiepiscopo fidelitatis faciens iuramentum et ab ipso regalium investituram recipiat, ut tenetur. Alioquin eidem archiepiscopo plenam facultatem atque licentiam dedimus omnia iura regalium in castris monetis ministerialibus et fidelitate vassallorum sibi et eius ecclesie subtrahendi. Quam ob rem tibi firmiter precipiendo mandamus, quatinus, si prefatus episcopus eidem sententie contumaciter parere noluerit, sepefato archiepiscopo tuis auxiliis assistas viriliter in hac parte cogendo episcopum memoratum, ut ab ipsis cedat regalibus et illa permittat memorate Salzpurgensis ecclesie archiepiscopum pacifice per omina possidere. Dat. Anagnie, II non. septembr., indictione IIII^ta.||
S.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 391.