Fridericus dei gratia Romanorum imperator semper augustus Ierusalem et Sicilie rex universis vassallis Gurzensis ecclesie gratiam suam et omne bonum. Cum sententiam de questione regalium contra Gurzensem episcopum et ecclesiam suam per inclite recordationis O(ttonem) IIII^tum predecessorem nostrum pro Salzpurgensi ecclesia latam ac per dilectum filium nostrum H(einricum) Romanorum regem illustrem de principum consilio et assensu postmodum innovatam duxerimus confirmandam, nos eidem episcopo dedimus * firmiter in mandatis, ut ipsi parere sententie non postponat dilecto principi nostro venerabili Salzpurgensi archiepiscopo fidelitatis faciens uramentum et ab ipso regalium investituram recipiat, ut tenetur. Alioquin ipsi archiepiscopo plenam facultatem atque licentiam dedimus omnia iura regalium in castris monetis argenti fodinis ministerialibus et fidelitate vassallorum Gurzensi episcopo et eius ecclesie subtrahendi. Quam ob rem, * si dictus episcopus Gurzensis sententie prefate contumaciter parere noluerit, vos ab eius fidelitate ratione foedi reddimus sententialiter absolutes volentes, ut a memorato archiepiscopo foeda, que prius a Gurzensi tenebatis ecclesia recepta, de cetero teneatis parendo eidem in omnibus fideliter et devote. Quod si non feceritis, dilecto principi nostro F(riderico) illustri duci Austrie et Stirie dedimus nostris litteris in mandatis, ut vos ad id auctoritate nostra compellat ipsi archiepiscopo suis auxiliis viriliter assistendo. Dat. Anagnie, II. non. septembr., indictione IIII^ta.||
S.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 392-393.