Wir Chunrat von gotes gnaden ertzpischolf ze Salzburch legat des stuls ze Rome veriehen an disem brief, daz wir mit verdahtem mut durch der liebe willen, die der edel grave Albreht von Gortz zu uns und zu unserem gotshous ze Salzburch hat und enne her lange gehabt hat, uns mit im veraint haben gantzer vreuntschaft und loben ouch, daz im hintz seinen purgen Hevnuels, Virig, Varbenstain, Valkenstain, Lint, Rotenstain, Penche und Vragan den clausen, seinen gegenden und sinen leuten, choufleuten und swie si genant sein von dem heutigen tag, daz ist an dem phingesttag untz an sand Veites tag, der schirist chumpt, darnach in vier iaren von uns noch von unseren purgen Matray, Chimburch, Velsperch, Sachsenpurch, Lengenberch, Stalle und Gemvnde von unseren leuten daselben, der wir gewaltich sein ouf dieselben zeit dehain schad iht geschehe. Wær aber, daz in der zeit zwischen unseren leuten und des vorgenanten graven dehain chriek oder dehain ansprach widerfuer, daz sulen unsernthalben unser rihter pezzeren und sol der chlager seinem gescholen nachvaren in daz geriht, da er inne gesezzen ist, als am sulen ouch sein rihter herenkegen pezzeren und ouch unser chlager iren gescholen nach varen in daz geriht, da si gesezzen sint. Man sol ouch paidenthalben nieman entweren an reht. Wær aber, daz die rihter niht rihten wolten noch mohten, daz die sache leihte ze starch wær und ze groz, so sol der grave Albreht seinenthalben rihten unde pezzeren und unserthalb unser vitztum von Vriesach. Tæten auch die Rotenstainer wider uns und wider unser gotshous iht, des sol uns der vorgenant grave Albreht gegen in zu legen und beholfen sein getreulich und an geverde. Ez sulen ouch dise sætze, die hie geschriben sint, niht schaden den gelubden und der ainunge, die wir haben mit hertzogen Friderichen von Osterich und mit hertzog Rudolfen und mit hertzog Ludwigen den pru/ederen von Paieren und sulen ouch paidenthalben dise sætz niht irren. Wir tailen paidenthalben unser leut der vorgenant grave Albrecht und grave Heinrich sin bru/eder und wir swenne wir sein stat mugen gehaben. Und daz dise gelubde als hie vor geschriben ist, stete und gantz beleiben, geben wir disen brif ze einem urchunde mit unserem insigel, der ist gegeben ze Salzburch, do man zalt von Christes geburtte dreuzehen hundert iar in dem ahten iar dar nach an dem heiligen tage ze phingesten.||
S.^a)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 290-291.