In nomine domini Amen. Que geruntur in tempore, ne simul labantur cum ipso, placuit, ut ea, que ad posteros volumus derivari, scriptis reciperent firmamentum. Noverint igitur universi huius litere auditores, quod ego Hainricus senior de Witra, et ego Chunigundis uxor eius, ac ego Heinricus filius eorum Marschalkus austrie, nos, inquam, considerantes fundationem sanctimonialium, que ad nos tamquam ad fundatores respicit, non posse ibidem durabiliter radicare propter causarum repugnanciam diversarum, annuimus conmuniter animo diligenti, ut amicus noster Stephanus de meyssow de cura predicte fundationis se totaliter intromittat, transponendo ipsam et locando, ubi cognoverit posse proficere et ei visum fuerit melius expedire. Jam dicto Stephano presentibus nos firmiter obligamus, quod prefate fundationi ac iuri advocacie eiusdem ex nunc renuncciamus simpliciter et precise taliter, ut in quocumque loco per eum transposita fuerit fundatio memorata, ibi nullum ius debemus nobis aliqualiter usurpare, hoc solum excepto, quod super bona, que nos contulimus, domui prenotate, defensores et advocati tenemur esse contradiccione qualibet non obstante. In quorum omnium testimonium atque robur supradicto Stephano offerimus sigillorum nostrorum munimine has literas roboratas. Datum et actum monasterio Zwetlensi anno domini millesimo ducentesimo LXXVII decimo Kalendas Augusti testibus annotatis, qui sunt hii. Dominus Hainricus Abbas de sancta Cruce. Dominus Chunradus abbas de liligenveld. Dominus Ebro abbas de Zwetla Hadmarus de Sunberch. et filius suus hadmarus. Hugo et hadmarus de Liechtenvels. Otto et Albero de Rastenberch. Poppo de Liebnwerch. Ortolfus de Ronnberch. Et alii quam plures.

Source Fulltext: ZEIBIG, Stiftungsbuch (=FRA II/6, Wien 1853) S. 155-156