Nos Albertus dei gracia Dux Austrie et Styrie Dominus Carniole Marchie ac portus naonis scire volumus presentes litteras inspecturis, quod strenuus vir Stephanus de meyssaw Marschalcus Austrie dilectus fidelis noster quondam veniens ante nos nobis iudicio presidentibus in placito generali Wienne habito coram nobis quandam conmunem questionem proposuit et quesivit, videlicet si bona sua proprietaria, que ab amicis suis coheredibus eque divisa iuxta jus illud vulgo dictum fuerzicht proprietarie possideret et haberet, quorum bonorum divisionem iam dudum fore factam inter ipsum et amicos suos coheredes eorundem bonorum ligitime approbavit, cuicunque vellet, libere dare posset. Super qua questione per conmunem sentenciam nobilium et sapientum ac fide dignorum virorum nobis astancium et assidencium in iudicio et placito nostro generali coram nobis sentenciatum extitit et concessum, quod omnia sua bona proprietaria eque divisa per ius illud „fuerzicht“ yulgo dictum, ut supra tactum est, etiam invitis omnibus amicis coheredibus suis et absque inpedimento quolibet cuiuscumque sive bona eadem in salutem et remedium anime sue in pios usus convertenda, aut alias quo dare voluerit licite et libere dare possit iuxta arbitrium liberum et libitum sue proprie voluntatis. In cuius questionis sibi concesse et admisse et facti memoriam sive testimonium evidens presentes litteras patentes cum sigilli nostri inpensione et testibus infra scriptis eidem Stephano dedimus et fecimus assignari. Testes sunt dominus Otto senior de Haslow, dominus Hadmarus senior de Sunberch, dominus Hermanus de Wolfkestorf, dominus Hainricus de Chunringe, dominus Hadmarus iunior de Suneverch sive de Hornsperch.dominus Lewtwinus, dominus Hermannus et dominus Wulfingus fratres de Sunberch Ministeriales austrie. Dominus Chunradus de Praitenveld Marschalcus curie, dominus Wolfkerus de Vischemund, dominus Otto grecus dictus, Milites et plures alii fide digni. Datum Wienne Anno Domini Millesimo ducentesimo LXXXV, XVI, Kalendas Marcii.

Source Fulltext: ZEIBIG, Stiftungsbuch (=FRA II/6, Wien 1853) S. 156-157