Honorius episcopus servus servorum dei. Dilectis in christo filiabus Abbatisse et conventui Monasterii sancti bernhardi in Chrueg ordinis cysterciensis Pataviensis dyocesis salutem et apostolicam benedictionem. Cum a nobis petitur, quod iustum est et honestum, tam vigor equitatis, quam ordo exigit racionis, ut id per sollicitudinem officii nostri ad debitum perducatur effectum. Eapropter in christo dilecte filie vestris iustis postulacionibus grato concurrentes assensu omnes libertates et inmunitates a predecessoribus nostris romanis pontificibus sive per privilegia seu alias indulgencias vobis et monasterio vestro concessas, nec non libertates et exempciones secularium exaccionum a regibus et principibus et aliis christi fidelibus racionabiliter vobis indultis (indultas) sicut eas iuste ac pacifice possidetis, vobis et per vos eidem monasterio auctoritate apostolica confirmamus et presentis scripti patrocinio conmunimus. Nulli ergo omnino hominum liceat, hanc paginam nostre confirmacionis infringere, vel ei ausu temerario contraire. Si quis autem hoc attemptare presumpserit, indignacionem omnipotentis dei et beatorum petri et pauli apostolorum se noverit incursurum. Datum Rome aput sanctam Sabinam VI. Kal. Maii Pontificatus nostri anno primo.

Source Fulltext: ZEIBIG, Stiftungsbuch (=FRA II/6, Wien 1853) S. 162-163