Albertus Dei Gracia Dux Austrie et Stirie, Dominus Carniole Marchie ac Portus Naonis. Vniuersis tam presentibus, quam futuris, ad quos presens scriptum peruenerit, in perpetuum. Cum ad loca religiosa et personas diuino cultui deputatas pie consideracionis Aciem dirigimus, et ad earum libertates seruandas, ac facultates augendas nos benignos et faciles exhibemus et temporalis affluencie incrementum et eternorum subsidium nobis exinde prouenire nullatenus dubitamus. Eapropter noverint uniuersi tam posteri, quam presentes, quod nos Religiosas feminas Abbatissam et conuentum Sanctimonialium aput Sanctum Bernhardum in Chrueg Cysterciensis Ordinis Patauiensis dyocesis fauoris nostri plenitudine prosequentes easdem cum personis et rebus suis omnibus, quas in presenciarum possident, aut eciam in futurum iusto titulo dante domino poterunt adipisci, sub alas nostre protectionis suscipimus specialis, volentes ipsas omnibus graciis iuribus et libertatibus illis gaudere, quibus alii ordines in conmuni et specialiter Ordo Cisterciensis ex indultis diuorum Imperatorum et Regum Romanorum Illustrium per orbem ubique gaudere noscuntur, quarum videlicet libertatum quasdam in specie permissione munifica decreuimus declarandas Videlicet, quod in omnibus possessionibus earundem Abbatisse et Conuentus sibi iudicium quodamque conpetat, causis mortis duntaxat exceptis. Item si fur aut malefactor alius mortis obnoxius in bonis ipsarum deprehensus fuerit et detentus, per officialem ipsarum assignandus sit cingulotenus iudici conpetenti. Item in causis ciuilibus dicta Abbatissa et Conuentus coram nobis et non judicibus aliis respondere de iusticia debita censeantur astricte. Mandamus igitur vniuersis et singulis fidelibus nostris firmiter et districte, ne dictum Monasterium uel personas deo famulantes ibidem una cum bonis ipsarum presumant aliquatenus molestare aut iura infringere, vel concessas eisdem libertates quomodolibet violare. Qui uero in contrarium venire presumpserit, indignacionem nostram grauissimam se nouerit incurrisse. In cuius rei testimonium et robur perpetuo valiturum presens scriptum exinde conscribi et sigilli nostri munimine iussimus conmuniri. Datum Wienne per manum Magistri Gotfridi nostri prothonotarii Idus Maij. Anno Domini Millesimo Ducentesimo Nonagesimo quarto.

Source Fulltext: ZEIBIG, Stiftungsbuch (=FRA II/6, Wien 1853) S. 163-164