Ich Alber von Marchartstorf vnd Reykart sein hausurou vnd vnser erben veriechen vnd tuen chunt alle den, die disen prief lesent oder horent lesen, di nu lebent oder her nach chunftig sint, daz wir mit wol verdachtem muet vnd mit guetem willen aller vnser erben vnd nach rat vnser naechsten vreunt vnd mit gesampter hant zu der zeit, do wier iz wol getuen mochten, verchauft haben der ersamen vrowen vroun Annen Aptessin vnd der sampnung alle des chloster datz sand Bernhart vnsern tail an dem hof datz Peugen mit hofmarich, mit paungarten, mit echern, mit wismad, mit weingarten, mit holtz an daz guet daz wir vor auf vnserm tail dez hofs genomen vnd getzogen haben, phenning gelt auf holden vnd auf vberleut, daz wir vor auz behalten haben, was auer dez andern vnsers tails ist, daz wir an dem vorgenanten hof ze Peugen gehabt haben vnd daz mich vorgenanten Albern erbleich mit rechtem tail angeuallen ist, ez sei aygen, lechen, oder purchrecht, daz hab wir verchauft dem egenanten chloster vm sechtzig phunt wienner phenning, der wier gancz vnd gar gewert sein, furbas allen iren frum da mit schaffen, verchauffen, versetzen, vnd geben, wem si wellen an alle irrsal. Dez aygenschaft in auch Hertzog Albrecht ze Ostreich, die er an etleichem tail dez hofs gehabt hat, in durich got gegeben hat, vnd sei wier ich obgenant Alber vnd Reykart sein hausurou vnd alle vnser erben dez vorgenanten guetes allez ir recht gewern vnd scherm, alz solches gutez recht ist vnd dez Landes gewonhait in Osterreich. Wer aber daz daz si mit recht an dem selben guet icht chrieg oder ansprach gewunnen, waz si dez schaden nement, den schullen wier in allen auz richten vnd wider cheren an allen iren schaden. Taet wir dez nicht, so schullen seu oder wer ir gewalt hat mit vnserm guetem willen bechomen von allem dem guet, daz wier haben in dem land ze Osterreich. Vnd dar vber zu aeinem warn vrchvnde vnd ewiger stetichait diser sach gib ich Alber von Marchartstorf dem oft genanten Chloster ze sand Bernhart disen prief versigelten mit meinem insigel. Dez ist auch gezeug mein herre her Stephan von Meyssaw, obrister Marschalich in Osterreich vnd mein svager her Ortlieb der Tumbraczer mit iren insigel. Der prief ist geben nach Christ puerd dreutzehen hundert iar, dar nach in dem sechs vnd fvmftzigistem iar an sand Jorgen tag.

Source Fulltext: ZEIBIG, Stiftungsbuch (=FRA II/6, Wien 1853) S. 303-304