Alexander episcopus seruus seruorum dei dilectis filiis Cunrada abbati Garsten monasterii eiusque fratribus tam presentibus quam futuris regularem uitam professis In perpetuum. Desiderium, quod ad religionis propositum et animarum salutem noscitur pertinere, animo nos decet libenti concedere et petentium desideriis congruum impertirj suffragium. Ea propter dilecti in domino filij uestris iustis postulationibus clementer annuimus et prefatum monasterium, in quo diuino mancipati estis obsequio, sub beati Petri et nostra protectione suscipimus et presentis scripti priuilegio communimus Statuentes, ut, quascumque possessiones, quecumque bona idem monasterium in presentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis prestante domino poterit adipisci, firma uobis uestrisque successoribus et illibata permaneant. In quibus hec propriis duximus exprimenda uocabulis, Predium uidelicet ad beheimberch tradidit Marchio Otacher de stira in manus Altmanni episcopi Patauiensis et aream, ubi constituta est ecclesia, pro parrochia Garsten, in qua monasterium fundatum est, et pro omnibus, que sunt in hoc termino siue appenditiis scilicet omnia, que interiacent inter Rubinich inferius vrbem Manantem et Rubinich superiorem et infra fluuium anaesum et fluuium Stiram usque in Rotenbach et ultra Stiram dotem illam et Molendinum cum iure suo et Curtim illam, ubi Rubinich labitur in Anesum cum decimatione et toto iure sacerdotali cum libera inuestitura, Parrochiam Auelenz cum omni decima et dote sua, cuius termini sunt a fluuio Rubinich usque ad cursum frůdenize alterius fluminis et usque ad principium Auelenz usque ad portam cum omni parrochiale iure. Siluam a Chunrado nobilj uiro de Ratkoz traditam monasterio. In hac autem Silua territorium constitutum est, quod triginta mansionibus et uillicatione una consistit. Ea uero, que ab eis episcopis uel ab aliis uobis rationabiliter sunt indulta, sicut hactenus obseruata, ita et amodo precipimus inuiolabiliter obseruarj. Sepulturam quoque loci illius liberam esse concedimus, ut eorum deuotioni et extreme uoluntatj, qui se illic sepeliri deliberauerint, nisi forte exconmunicati sint uel interdicti, nullus obsistat salua tamen iustitia parrochialium ecclesiarum, a quibus mortuorum corpora assumuntur. Crisma uero, oleum sanctum, consecrationes altarium siue basilicarum, ordinationes etiam monachorum, qui ad sacros ordines promouendi sunt, a diocesano suscipietis episcopo, siquidem catholicus fuerit et gratiam atque communionem apostolice sedis habuerit eaque gratis et sine prauitate uoluerit exhibere. Cum autem generale interdictum terre fuerit, liceat uobis clausis ianuis exclusis excommunicatis et interdictis, non pulsatis campanis, suppressa uoce diuina officia celebrare. Liceat quoque uobis clericos uel laicos e seculo fugientes liberos et absolutos ad conuersionem recipere et eos sine contradictione aliqua retinere. Prohibemus insuper, ut nulli fratrum uestrorum post factam in eodem loco professionem aliqua leuitate sine Abbatis sui licentia fas sit de claustro discedere. Discedentem uero absque communium litterarum cautione audeat retinere, nisi obtentu artioris (sic) religionis. Sane noualium uestrorum, que propriis manibus uel sumptibus colitis siue de nutrimentis animalium uestrorum nullus a uobis decimas presumat exigere. Obeunte uero te nunc eiusdem loci Abbate uel tuorum quolibet successorum nullus ibi qualibet subreptionis astutia seu uiolentia preponatur, nisi quem fratres communi consensu uel fratrum pars sanioris consilij secundum dei timorem et beati Benedicti regulam preuiderint eligendum. Decernimus ergo, ut nullj omnino hominum liceat prefatum monasterium temere perturbare aut eius possessiones auferre uel ablatas retinere, minuere aut aliquibus uexationibus fatigare, sed omnia integra conseruentur eorum, pro quorum gubernatione ac sustentacione concessa sunt, usibus omnimodis profutura salua sedis apostolice auctoritate et diocesani episcopi canonica iustitia. Siqua igitur jn futurum ecclesiastica secularisue persona hanc nostre constitutionis paginam sciens contra eam temere uenire temptauerit, secundo tercioue commonita, si non satisfactione congrua emendauerit, potestatis honorisque suj dignitate careat reamque se diuino iudicio existere de perpetrata iniquitate cognoscat et a sacratissimo corpore et sanguine dei et dominj redemptoris nostri iesu christi aliena fiat atque in extremo examine districte ultioni subiaceat. Cunctis autem eidem loco iura seruantibus sit pax domini nostri iesu christi, quatinus et hic fructum bone actionis percipiant et apud districtum iudicem premia eterne pacis inueniant Amen, Amen, Amen.||
(Monogramma.) Ego Alexander catholice ecclesie episcopus S. S. Ego Hvbaldus Hostiensis Episcopus ss. C. Ego Johannes Presbyter Cardinalis Sanctorum Johannis et Pauli tituli Pomachij SS. C. Ego Johannes presbyter Cardinalis tituli Sancti Marci SS. C. Ego Petrus presbyter cardinalis tituli sancte susanne S. S. C. Ego Jacinthus diaconus cardinalis sancte Marie in cosmidyn (?) ss. C. Ego Ardicio sancti theodori diaconus card. S. S. C. Ego Rainerius diaconus cardinalis sancti georgij ad uelum aureum S. S. C. Ego Rainerius diaconus cardinalis sancti Adriani ss. C. Ego Cinthyus presbyter cardinalis tituli Sancte ecclesie SS. Datum Lateranis per manum Alberti sancte Romane ecclesie presbyteri Cardinalis et Cancellarij Nonis Aprilis Indictione XII. Incarnationis dominice M° C°. LXXVIIII. Pontificatus uero domini Alexandri pape iij. Anno XX.

Source Fulltext: OÖUB 2 (Wien 1856) S. 359-361