Ich vlrich von Chappell hern Pilgrims svn vnd Elzpet min hovzfrowe tvn chvnt an disem priefe allen den, die in ho^erent oder sehent, daz vns min herre apte Marchart ze Gersten vnd sin Convent hat verlichen daz gvt datz ze trestorf, da die vier man avf sitzent, mit alle dev, daz dar zv gehoret, ze vnser baider tagen, die weile wir leben, mit so getaner beschaidencheit, daz wir im vnd dem gotshavse svllen dienen alle iar an vnser frowen tag, als si geborn wart, sechtzig pfenning vnd svllen daz selbe gvt an nichte verchvmbern dem gotshavse ze schaden weder mit verchavffen noch mit versetzen noch mit leichen. Ist aber, daz wir daz gelv^ebde zebrechen vnd daz gvt verchvmbern, so ist iz ledik von vns vnd ist dem goteshovse ertailet mit allem rechte vnd haben da mit nimer ze schaffen noch dar vf ze sprechen, vnd swenne wir nicht mer sein, so svllen vnser chint noch vnser erbin nocb dehain vnser frevnt dehain ansprach noch dehain vodervng haben avf daz selbe gvt. Datz ditze gelv^ebde stete beleibe vnd nicht verchert werde von dehainer missehelvnge, da geben wir disen brief vber versigelten vnd bestaetten mit mins hern insigel aptes Offen von Glv^onich vnd mit dem vnserm vnd mit den Miner zwaier vetern hern vlrichs vnd Chvnrates von Chappell vnd mit mins geswein insigel Gvndakers von Losenstain vnd hern Marchartes des prevhaven vnd mit den gezevgen, die hie geschriben sint: Her Perchtolt prevhaven, Her Otto von Osterberch, vlrich scheche, Otto von Zening, vlrich von Tůrsendorf vnd sin bruder ditmar, Josep, Heinrich Ponhalm vnd sin bruder Marchart, Ditmar der schachaer, Pernger der svltzer, Haintzman, Heinrich pfenninch, Ortel der Chersberger, Ortel des Rogendorffaer aidem vnd ander gezevg genvge, den daz chvnt ist, daz iz geschach ze Steir nach Christes gebvrt vber tavsent iar, zwai hvndert iar vnd zwai vnd achtzig iar an dem hailigen abent ze pfingsten.

Source Fulltext: OÖUB 3 (Wien 1862) S. 547, Nr. 595