Ich vlrich der Rotenmoser vergih allen den, die disen prief sehent oder horent lesen, daz ich Hainreichen dem mulner von ense han ze chauffen gegewen dev hueb ze cho^eting mit vereintem mu^et vnd mit meiner hausvrowen vrowen Alheiten vnd aller meiner chinde gutlichem willen vnd mit hern Heinrichs hant von husendorf, der salman ist vber daz gu^et. Ist aber, daz iemen vf das gu^et iht sprechen wolt, so schol ich vlrich der rotenmoser vnd mein hausfrowe vnd minev chint daz vor genant gut schermen vnd sin gewer sein dez gu^etez. Des sind gezeug Her Heinrich der laufener, Her heinrich von hu^esendorf, Her Reicher von husendorf, Ott der dorfmeister, Eckhart munser, ditrich der hungerperger, Ortolf der nahrihter, Chunrat an dem ekke, Chunrath wisent, Rapot sin svn, Perhtolt mevzel, Seifrid der Mulner vnd ander warhaft leut. Daz daz also stet beleibe, des gib ich im disen brief zu einem sihtigen vrchund gevestent mit der stat ze ense anhang vndem insilgel. (sic) Daz ist geschehen, do von christes gepu^erd waren Tovsent Jar vnd an fumf Jar Drevhundert Jar darnah des nehsten vreitagz vor vaschang.

Source Fulltext: OÖUB 4 (Wien 1867) S. 222-223, Nr. 245