Wir Abt Perhtolt von dem Heiligen Chreutz vnd ich Herman der Marschalch von Landenberch vnd ich Maister Otte Schreiber des Edeln Hertzogen von Osterrich veriehn vnd tu^en ze wizzen allen den, di disen brief ansehnt oder heorent lesn, di nu lebnt vnd hernach chumftieh sint, daz der guet man prueder Seifrid vnd sein housfrowe vroˆ Gedrout vor vns von dem chrieg vnd der ansprach gentzlich lazzen habent, der si iaˆhen ouf zwen weingarten likkent ze Medlich, vnd habent sich paidiv der vorgenanten weingarten vor vns loutterleich verzigen ze haben ledichleich dem Gotshous vnser vroˆwen ze Gersten vnd ewichlich ze besitzen an allen chriech vnd guet wal habe ze versetzen di vorgenanten weingarten oder verchouffen vnd damit seinen frûm ze schaffen als mit anderm des Gotshous guet, vnd ist ouch di furziht vor vns von in baiden also geschehn, daz er prueder Seifrid vnd sein Housfrowe vro Gedrv°t furbaz ouf di vorgenanten weingarten dehain ansprach haben suln. Doch daruber swy si paidiv dehain reht an den vorgenanten weingarten haben gehabt, habent in der Ersam abt vlrich vnd di Samnunge des Gotshoûs ze Gêrsten ze lieb gegebn daz iaˆr hivr ein halbes fueder weins vnd einen Mutte chorns. Daz dise sache, alz ez vor vns geschaiden vnd gelobt ist, furbaz stet an chriech vnd vnzerbrochn behalten werde, daruber gebn wir den vorgenanten abt vlrichen vnd der Samnunge des Gotshous ze Gersten disen brief ze vrchunde vnd ze sicherhait vnd gehugnûsse beuestent vnd befestigt mit vnsern anhangunden jnsigeln vnd mit den Erbern Gezivgen, di hie hernach geschriben sint. Daz ist Her vlrich der Hofmaister, Her Chunrat der praitenvelder, Her Haym, Her Dietmar der Schachner, Her Levtwein von Mourbach, friderich von Mourbach, wolfram der amman vnd ander Erber Leût genueg, di dabei waren. Diser brief ist geschriben vnd gegebn, do von Christes geburt waren Tousent iaˆr, zway Hundert jar, in dem fumf vnd Neuntzkisten jar des nosten Mentages noch Sand Dyonisij tach.

Source Fulltext: OÖUB 4 (Wien 1867) S. 228-229, Nr. 252