Ich Chv^enrat von volchenstorf tv^en chvnt allen den, di disen brief ansehent, daz ich Heinrichen dem widmer meins herren abte vlrichs von Gersten brveder vnd siner hausfrowen Elspeten di hvebe, div da haizzet an der hvebe, datz wolfarn han gelihen ze rehtem lehen und wil ich vnd min svn Dietreich des selben gvetes ir gewer vnd ir herre sin vnd swaz siv bediv chinde mit einander chnehte oder iunchfrowen gewinnent, den selben chinden shvllen wir diselben hvebe leihen, vnd daz in daz lehen vnbechrentz (sic) vnd stete beleibe von vns vnd von vnsern nachchomen, dar vmb gib ich in disen briefe bestetigten mit meinem insigel vnd mit den gezevgen, di hie geschriben stent: Her Heinrich prevhafen der oelter, Her Heinrich prevhafen der iunger, Her Vlrich von Tursendorf, Her Ditmar von Tursendorf, Her Ditmar der Shachner, Erchenger der Svltzer, Wulfinch datz Steir, Otto der Milchtopf, Otte der Chersperger, Ortolf cherspcrger, O^ertwin, wolfhart, Heinrich liepker, Heinrich der Mauter von Ense vnd ander bideb (sic) leute. Ditz ist geshehen nach Christes gebu^erte vber tavsent iar, zwai hvndert iar, Nevntzeg iar vnd Ochte. In der veier tagen ze Ostern.

Source Fulltext: OÖUB 4 (Wien 1867) S. 280-281, Nr. 301