Ich Marquart der Preuhauen heren Hainriches sv°n offen vnd tv°n chv°nt mit diser schrifft allen den, di iz ho^eren vnd wissen wellent, daz ich gv°tlich vnd gerne mit meiner brv^eder gv^enst vnd gv°tem willen vnd meiner erben vnd ovch nah miner besten friwnde rat han gegeben dem Goteshovse ze Goersten ze rehtem aigen min hůbe dazze ze swammaren, der ich des Goteshovses rehter gewer bin, di waeil ich leb vnd nah mir sein sv°len min naehste erben, ze rehtem saelgraeit durch mines vater sele willen in solhem reht, daz die gemain des Conuentes da selben mines vater iartachk, dem got genade, alle iar begen schv°len vnd sin gehv°ge haben vor sand kateraeins tag einen tachk oder des naechsten dar nah mit gelaevt, mit vigilie, mit gemainer messe aller der waeise reht sam sin lichnam da enkagen stê vnd ovch nah sitticher vnd gewonlicher andaht. Swer ovch herre vnd abt da ist, der sol den herren in die gemain dienen des selben tages von der vorgenanten hv°be zv der gesazzten pfrivnde ein halbes phvnt phenninge, daz sol ovch in ewichlichen niht ab gen. Dar v^eber schol man ovch mines vater sele sv°nder alle wochen ein prister v°z der samnv°nge in sand Laurentzzen Chappel ewichlichen ein messe sprechen, da er da bestatet ist vnd des iungsten da erbeiten wil, vmb sotan andaht mir vnd im ze behalten, han ich empfangen ovh des Goteshovses brief vnd insidel ze ainer staet vnd ze einem v°rchv°nde vnd han ovch ich mich gaenzlihen mit minen brv^eedern vnd erben der hv°be geeusent, dar vmb han ovch ich geben dem Goteshovse minen brief mit mines vetern insidel vnd mit dem minen. Des sint ovh zivge her Chunrat von volchkenstorf, der hainrich der Prevhauen, Her vlrich der Tv°rsendorfer, Her Dietmar sein brv°der, Her Marquart der Schechk, her Hainrich der Stroeler, Ott der Stadloer, Ernest der Lobnichkoer, her Wernher der Richtoer von Stoeyer vnd da zv° die bv^ergaer her Ott der milchtopf, Ortolf der Cherzpergoer, her Wlflnch der Hovchk der Ponhalme vnd andere biderber laevt vnd burgaere vil vnd genv°ch. Vnd ist geschehen, do von Christes bv°rte vergangen waren tovsent, driv hundert iar in dem anderen iar dar nach.

Source Fulltext: OÖUB 4 (Wien 1867) S. 423-424, Nr. 458