Rvdolfus, Fridericus et Leupoldus dei gratia Duces Austrie et Stirie, Domini Carniole, Marchie ac Portus Naonis omnibus presencium inspectoribus imperpetuum. Ad nostram venientes presenciam Honorabiles viri Abbas et Conuentus Monasterij Gerstensis Ordinis sancti Benedicti Patauiensis dyocesis petiuerunt a nobis deuote, vt Priuilegium quoddam ab Illustri quondam Leupoldo Duce Austrie et Stirie eidem Monasterio traditum et concessum dignaremur eisdem innouare et admitere de gratia speciali, cujus priuilegii tenor per omnia dinoscitur esse talis. Leupoldus dei gratia Dux Austrie et Stirie omnibus Christi fidelibus imperpetuum. Quia more torrentis etc. (Es folgt die in Graz ausgestellte Urkunde von 1177). Nos itaque prefati domini Levpoldi Illustris Ducis Austrie, vt decet, vestigiis inherentes ob nostram et nostrorum salutem et remedium animarum ac eorundem fratrum preces et merita, quibus se nobis hactenus ipsorum fidelitas et deuocio grates reddidit et acceptos, fauorabiliter inclinati prefatum priuilegium omnesque in eo contentos articulos de verbo ad verbum eisdem fratribus, et suo Monasterio innouamus, approbamus et presentis scripti patrocinio confirmamus. Nulli ergo omnino hominum hanc nostre libertatis paginam liceat infringere aut ei in aliquo ausu temerario contraire, quod qui facere presumpserit, nostre indignationis offensam se nouerit incurrisse. In cuius renouacionis testimonium sigillum nostrum, quo et nos Fridericus et Leupoldus fratres duces prefati vtimur in hac parte, hiis litteris patentibus duximus appendendum. Datum et actum Wienne presentibus hiis testibus subnotatis videlicet venerabili patre domino Hainrico Constantiensi Episcopo, Magistro Johanne Imperialis avle Cancellario, Leutoldo de Chvnring Pincerna Austrie, Stephano de Meyssaw Marschalco Austrie, Hermanno de Landenberch, Eberhardo, Vlrico, Hainrico et Fridrico fratribus de walse, Ditrico de Pilchdorf, Ortlibo de Winchel, Chunrado de Volchenstorf, Ottone de Zelking Wichardo de Topel et aliis pluribus fide dignis, Anno dominj Millesimo Trecentesimo Quarto in Purificatione Beate Marie Virginis.

Source Fulltext: OÖUB 4 (Wien 1867) S. 457-458, Nr. 492