Ich Heinreich der Prevhaven mit der Gemaein der Ritter ze Steyr vnd ich Peter der Ponhalm Richter ze Steir Veriehen Offenleich an disem prief, Daz iz manigev iar von vnsern vodern an vns herchomen ist an allen chriech, daz der Ersam Herre Abt vlreich von Gersten vnd swer nach im da abt wiert, vnser rechter Pharrer ist v^eber die Stat ze Steyr, v^eber die Chappelle in der Pvrge vnd v^eber daz Spital vnd schv°llen ellev geistleichev dinch vnd pherrleich gab von im enphahen, als ein igleich pharre volch von seinem rechtem pharrer enphahen sol, also schv^elle auch wir iz von im enphahen vnd swenn er vns ze phleger setzet, dem er den gewalt geit die siechen ze berichten, die toten begraben, des schu^elle wir im alle gehorsam sein: also ist iz mit zeitlicher vnd mit alter gewonheit an vns chomen, des veriehe wir mit der gemein der Pv^erger peide arm vnd reich. Wir offen auch daz, daz wir dem vorgenantem Abt v°lreich vnd seiner Samnvng gelobt habn mit gemainern mv°nde, daz man niemen in dem Vreithof dacz dem Spital bestatten sol, danne der darinne stirbet, vnd gebn der vorgenanten sache dem Ersamen Herren Abt vlreichn vnd seiner Samnvng von Gersten disen prief ze einem gezevg versigelt mit vnser Stat jnsigel vnd mit der Ritter jnsigel, die hernach geschribn sint. Daz ist Her Heinreich der Prevhaven, Her Marchart der Schekh, Her ditmar vnd Her v°lrich die Tv^ersendorffer, Her Peter der Ponhalm der Richter ze Steir vnd dev gemain ellev ze Steir der Pv^erger peide arm vnd reich vnd ander piderb levt. Ditz ist geschehen ze Steir, Do von Christes gebv^ertte ||
warn Tausnt jar, Drev Hvndert jar vnd darnach in dem Fvmften jar an Sand Gedrovten tag in der vasten.

Source Fulltext: OÖUB 4 (Wien 1867) S. 478-479, Nr. 514