Ich vlrich von Anhang vergich offenlich an disem Prief vnd tun chunt allen den, di in sehent oder horent lesen, daz ich von dem Gůt auf dem weinperig geben sol alle iar an vnser vrowen tag ze der dienstseit dem Gotshause vnd der Samnung ze Ga^ersten Sehtzig newer phenning winer münz ze Cins alle die weil, daz ich leb, vnd swenne ich den Cins versitze, so sol mich der apt mit sinen poten da fu^er phenten auf dem selben gůt mit meinem gu^etlichen willen, swenne ich denne nimer lebe, so sol daz vor benant gu^et ledichlich an alle ansprach geho^eren hintz dem vor benanten Gotshause also, daz dehain mein Eriben nach dem gu^et dehainer slahte crieg nimmer mer sullen gewinnen, vnd daz deu red vnd daz geschaefte also stete vnd vnverchert immer ebichlich beleibe, so gib ich ze vrchunde dar v^eber disen prief bestette mit hern Eberhartes ynsigel von walsse, der ze der Ceit Landrichter ist gewesen, vnd auch mit meinem ynsigel. der red sind auch geceug her Otakcher von Lobenstain, her Dietmar von aistershaim, her Morichharte der Schekch, Ernst von Lobnikch, Magenhausen, Ott von Chrotendorf vnd ander piderber leute genug. Der Prif ist gegeben ze Wels do von Christes gepurd woren vergangen Tausent iar vnd Dreihundert iar vnd dar nach in dem sibenten iar Ze Mittervasten.

Source Fulltext: OÖUB 4 (Wien 1867) S. 520-521, Nr. 558