Ich Otte von Liehtenstain Chamerer in Steir Tůn chunt allen den, die disen brief sehent oder horent, daz ich dem erberem abbet ... von Goersten an sein selbes stat vnd an meiner stat gan ze verrihten vmb die zwo wissen, die Herrant von aiglaren inne hat vnd ir giht ze lehen von mir, So giht mein herre der abbet, si geho^eren an sein Gotshous vnd swaz dar an ist, daz sol er ho^eren mit vollem gewalt vnd dar vmb vragen die naehsten vnd die besten vnd nach derselben sage vnd weisung, swaz er da mit tůt, daz ist mein gůt wille vnd han daz selbe geren staete. Gib dar v^eber disen meinen brief mit meinem Insigel offenn ze vrchu^ende der warhait. Diser brief ist geben ze wienn Nach christes Geburt dreuzehenhundert jar dar nach jn dem Sibenten jare, des Mittichen an sande Pauls becherung tag.

Source Fulltext: OÖUB 4 (Wien 1867) S. 519-520, Nr. 557