Ich Chunigunt von Egendorf vnd allev minev chint svn vnd auch to^echter vergehen vnd tun chvnt an disem prif allen den, di in sehent lesent oder lesen horent, di nv lebent vnd noch chumftich sint, Daz wir mit verdachtem mv^et vnd mit gvtlichem willen vnd nach vnser vrevnt rat den hof an dem Sehachen, der do vnser rehtz aigen was, gegeben haben apt vlrichen, der do pfleger was, vnd vnser vrowen Gotshavs hintz Gesten (sic) ewichlichen mit alle dem reht vnd wir in gehabt haben versuchtz vnd vnuersuchtz an allez gever ze voderist durch Got vnd durch vnser sel willen vnd vnser vodern sel willen vnd darnach vmb funzich phvnt pfenninge, dez selben gutez si(nd) wir schon vnd gar gewert. Wir luben auch daz vnd pinten vns dar zv, daz wir den selben hof vnd swaz dar zv gehoret, dem vorgenanntem Gotshavs scherm wellen an aller stat, da wir in ze reht scherm schullen, vnd swo daz selb Gotshavs oder der apt vnd di Sampnvnge da selben chain schaden nemen von Ditmarn vnserm pru^eder, der ze den selben ziten niht macht noch getorst in dem lant gesin, den selben schaden schul wir in ab tvn mit sampt vnser mvter, swaz in an ainem ab gee, daz schullen si auf dem andern haben vntzen si gar gewert wurden. Daz ditz gelub stet beleib vnd vnverchert, geb wir in disen prif zv einem ewigen vrchunde versigelt mit vnsern insigeln vnd mit hern Heinriches insigel des prevhavenz vnd mit Peter ponhalmz insigel, der ze denselben ziten phleger ze styr was, vnd mit der erbern Purger insigel der stat ze styr vnd dar nah mit den erbern zevgen, di her nah geschriben sint: Ditrich von volchenstorf, Herman von chinbert, Ott hu^erbech, wulfinch, Heinrich pru^enner, Helmwich, vlrich sein pruder, Heinrich muchler purger ze styer, Heinrich enser, Heinrich lipker, perchtold amman vnd ander erber zevge. Ditz ist geschechen nach christes gepurde vber tavsent Jar, drev hundert Jar vnd dar nach in dem ainleften Jar an sant Katherein tage.

Source Fulltext: OÖUB 5 (Wien 1868) S. 66, Nr. 63