WErnhardus dei gracia Ecclesie Patauiensis Episcopus vniuersis christi fidelibus Salutem in domino iesu christo. Cum sanctis omnibus tanto maior deuocio et reuerencia digne ab hominibus exhibeatur in terris, quanto preclarioribus meritis ad patriam deducti excellenciori celsitudine glorificati creduntur in celis; qua gloria, quo honore gloriosissime virginis dei genetricis Marie digna, sit memoria, que vniuersis sanctis est sanctior et pro peccatoribus interuentrix potencior, nec mens concipere nec lingua proferre valeret. Vt tarnen illis allectiuis muneribus, que nostre largicioni sunt possibilia, ad eiusdem dei genetricis imploranda patrocinia christi fidelium deuocio incitetur vberius et locus suo fundatus et deputatus honorj in ipsius veneracione singularius honoretur, omnibus vere penitentibus et confessis, qui ad monasterium in Gersten nostre dyocesis, cuius prefata dei genetrix patrona principalis existit, in precipuis anni sollempnitatibus, videlicet Natiuitate domini, Pascha et Pentecoste ac in quatuor festiuitatibus prefate virginis gloriose nec non in Anniuersariis dedicacionum ipsius monasterij et altarium singulorum ac eciam patronorum altarium eorundem diebus causa deuocionis accesserint manumque porrexerint adiutricem, de omnipotentis dei misericordia et beati Stephani prothomartiris patrocinio confidentes Quadraginta dies Criminalium et Centum venialium de iniuncta ipsis penitencia misericorditer in domino relaxamus Presentibus litteris in testimonium nostro Sigillo munitis. Datum in Gersten anno domini M°. CCC°. vndecimo, Margarete virginis.

Source Fulltext: OÖUB 5 (Wien 1868) S. 59, Nr. 56