Ich Heinreich streler tvn chunt vnd vergich an disem prif allen den, di nv lebent vnd noch chvnftig sint, daz ich mit verdachtem mv^et vnd mit miner erben gu^etlichem willen han gegeben dem Gotshavs Hintz Gesten daz gv^et in dem stainech, daz ein schaf chorns dient, vnd daz lehen datz Heglinge ein halb phunt geltz durch miner sel vnd miner havsvrowen vren Margreten sel vnd miner chinde sel willen vnd ich Heinreich vnd min Havsvrow di vorgenant wellen daz halb phvnt geltz inn haben, di weil wir leben vnd han daz vorgenant gvt also dargeben, daz ich vnd min havsvrow vnd minev chinde tailheftig sein alles des gepetes vnd alles des almvsen vnd aller der gvttet, di di bruderschaft beget vnd auch swo got vber mich vnd vber min havsvrowen gepevt in dem lande, mit vnser vrevnt hilf sol man vns hintz Gesten pringen vnd da pestatten. Daz di red stete vnd vnverchert beleib, gib ich dem vor genanten Gotshavs zv einem vrchvnde disen prif versigelt mit minem insigel vnd mit mines svnes Marchatz (sic) insigel. Ditz ist geschehen nach christes geburde vber drevzehen hundert Jar vnd dar (nach) in dem zwelften Jar an sant Perchtoltz tage.

Source Fulltext: OÖUB 5 (Wien 1868) S. 83-84, Nr. 80