Ich Ditrich von volchenstorf Hern Chvnrates svn tvn chvnt an disem prief allen den, di in sehent lesent oder Horent, di nv lebent vnd noch chvnftich sint, Daz mein vater Her Chvnrat von volchenstorf hat gehabt ein widem ze Steyr bei der chirichen von dem Gotsthavs datz Gesten von gnaden vnd dar vber weder prief noch hantfes gehabt hat; di selben vorgenanten widem han ich ledichleichen auf gegeben dem dem (sic) vor genantem Gotshavs ze Gesten, wand ich chain reht dar an het noch gehaben macht. Daz di rede stete vnd vnverchert beleib dem vor genantem Gotshavs ze Gesten, gib ich disen prief versigelt mit meinem insigel vnd mit meins vetern insigel Hern Heinriches von volchenstorf vnd mit meins Ohaims Hern Heinriches prevhafens vnd mit Peters ponhalm insigel, der ze den ziten rihter was ze Steyr. Daz ist geschehen, da ergangen warn noch christes gepu^erde drevzehen hundert Jar vnd dar noch in dem vierzehent Jar in den veirtagen ze Ostern in dem Gotshavs datz Gesten.

Source Fulltext: OÖUB 5 (Wien 1868) S. 126-127, Nr. 126