Ich Peter ponhalm rihter datz Steyr tvn chvnt allen den, di disen prief lesent oder horent lesen, die nv lebent vnd noch chvmftig sint, Daz ich von Mines Herren apt vlreiches vnd miner Herren des gantzen Conventz datz Gesten gnaden erwarfen han mit grozzer gepet, Daz si von ir zuhten mich gewerten vnd mir erlaubten ze weihen di Chappeln in minem haus gepavn datz Steyr in der stat Also. daz ir phar vnd irem phefleichem reht dar an niht solt enzogen werden vnd auch daz iren willen vnd wider den Convent vnd den pharer datz Steyr, swer der si, in der selben Chappeln niemen mess singen oder sprechen oder peicht ho^eren sol weder prediger, parfuezzer, Augusteiner, laiprister oder swi si genant sein, an vrlaub des phareres vnd swen daz havs noch minem tod an geval, der sol daz selb reht dem vorgenantem Gotshavs behalten. Daz di sach dem vorgenanten Gotshaus vnverchert vnd stet beleib, Gib ich disen prif ze einem ewigen vrchvnde versigelt mit meinem insigel vnd mit der stat insigel ze Steyr vnd den erbern zevgen, di her nach geschriben stent: Her Heinrich vnd Her Marchhart prevhafen, Her Ott von Savrawe, Ditrich volchenstorfer, Ott scheche, Ott Hurnbech, Chunrat von pless, wlfinch, Ott Chersperper, Michahel, Ott, helmwich, vlrich, fridrich bruder, Heinrich muhler, Gotschalich Schreiber, walchvn Mavter, Heinrich chavfman vnd ander erber purger der stat ze Steyr vnd ist geschehen nach christes geburde vber tavsent vnd drevhundert Jar, dar nach in dem Sehzchenten Jar an Sand Bertelmez tag ze Gesten.

Source Fulltext: OÖUB 5 (Wien 1868) S. 174-175, Nr. 175