Ich Peter ponhalm vergich an disem prif vnd tvn chunt allen den, di in lesent oder Horent, di nv lebent vnd nach vns choment, Daz ich mit gutlichen willen vnd mit verdachtem mut han gegeben den Herren ze Gersten in die Oblay durch miner bruder sel Hail Chunrates vnd Fridriches daz aigen, daz da leit in Strenblitzer aigen, daz ze purchreht dient dreizich phenninge an Sant Michels tag vnd den Garten pei Alram am ort, den Ott der Vro^elich hat vnd dient alle Jar Zwelif phenning an Sant Michels tag, und pin auch miner Herren gewer des aigens vnd des Garten an aller stat fur alle ansprach, da ich ze reht sol. Daz di sach vnd di wandlunge stet beleib, gib ich disen prif ze vrchunde versigelt mit minem insigel vnd sjnt des zevge Her Heinrich vnd Her Marchart prevhefen, Ott schecke, Ott Hurnbech, chunrat von plesse, Heinrich vnd Jans bruder, Heinrich enser, peter, Stephan, Heinrich lipker, ortolf chastner des aptes diener van Gersten. Vnd ist daz ergangen nach Christes gepurde vber drevzehen Hundert Jar vnd dar (nach) in dem ahtzehenten Jar an Sant Nyclas tage.

Source Fulltext: OÖUB 5 (Wien 1868) S. 232-233, Nr. 237