Wir Friderich von gotes gnaden Ro^emischer Ku^enich, alle zit ein merer des Riches tůn chunt allen den, di den brief sehent oder ho^erent lesen, Daz wir der erbern Dyemu^et Heinrichs witwen von Moln vnd Heinrich vnd Ruedger ir svnen vnsern willen vnd gunst geben habent, Daz si drev ir gut, di da heizzent am Aschach, vnd drev, di da ligent im Obleins tal, di si vun vns vnd von vnsern vordern ze lehen gehabt haben, dem erbern man Thoman von Gersten verchauft haben mit allen dem recht, als si di vorgenanten gu^et vntz her inn gehabt habent, vnd haben auch durch ir bet di vorgenanden gu^et von in aufgenomen vnd dem vorgenanten Thoman verlihen mit allem dem recht, als si di vorgeschriben gu^et von vns gehabt habent, Vnd geben dar vber dem vorgenanten Thoman disen brief. versigelt mit vnserm jnsigel. Der geben ist ze Steyr an sand Agethen tage, do man zalt von christes geburd Drevzehen Hundert jare vnd dar nach in dem Nevnzehenden jare, in dem funften jare vnsers Riches.

Source Fulltext: OÖUB 5 (Wien 1868) S. 238-239, Nr. 244