Ich Chunrat van pless vergich vnd tvn chvnt an disem prief allen den, di in sehent lesent oder horent, di nv lebent vnd noch chvmftig sint, Daz ich mit verdachtem mvt vnd mit miner havsvrowen vren levgarten vnd aller vnser erben svn vnd tochter gutlichem willen han gewechselt mit dem erbern apt otten vnd mit der Sampnvnge des Gotshavs ze Gersten mit der hu^eb auf dem wagrain in Sant Valteins pharr, di mein vnd miner Hausvrowen levgarten vnd vnser erben rehtz aigen ist, Vnd hat der vorgenant apt vnd di sampnvnge des Gotshaus ze Gersten her wider gegeben mir vnd miner hausvrowen vnd vnsern erben ze widerwechsel ein gu^et, leit pei mir ze Raumichdorf vnd haizzet an dem graben, Vnd pin ich vnd mein erben der vorgenanten hub des Gotshavs gewern ze Gersten vnd der sampnvnge. Daz di sach also stet zwischen vns beleib vmb den wechsel, gib ich disen prif versigelt mit minem Insigel vnd bestetiget mit den erbern zevgen, di hie geschriben sint. Her Heinrich vnd Her Marchart prevhefen, Ditrich van volchenstorf, Peter prevhafen, Ruger van Zavch, wolfker der wasner, Hertneid chreslinch, Marchart streler, Ott Schech, Peter ponhalm, Ott Hurbech, Heinrich, Jans bruder, Heinrich enser, Heinrich lipker vnd ander piderb levt vnd ist daz geschehen, da ergangen warn nach christes geburde drevzehen hundert Jar vnd dar nach in dem Nevnzehenten Jar an sant Johans tag ze svnbenten.

Source Fulltext: OÖUB 5 (Wien 1868) S. 243-244, Nr. 250