Ich Peter ponhalm vergich vnd tvn chvnt an disem prif allen den, di in lesent oder horent, di nv lebent vnd nach chvmftig sint, Daz ich mit wol verdachten mu^et vnd mit miner havsvrowen vren Margreten ynd mit minen erben gutlichem willen dem Gotshaus hintz Gersten auf vnser vrowen alter han gegeben ze einem selgeret den Garten auf der ens leiten, der mein rehtes aigen ist vnd emoln des volchenstorfers was ze Styr, durch miner vodern sel vnd durch meiner sel hail vnd ich auch dem Gotshaus triwen gepunten pin di weil, vnd ich leb. Daz di red vnzerbrochen dem vorgenaten (sic) Gotshaus beleib, gib ich disen prif ze einem ewigen vrchvnde versigelt mit der erbern herren Insigeln Hern Heinrichz vnd hern Marchartz prevhefen vnd Hern otten des Schecken vnd mit dem meinem Insigel vnd bestetiget mit den erbern zevgen Ott hurnbech, chunrad van plesse, Heinrich, Jans bruder lipker, Heinrich enser, perchtolt amman, wulfinch, ott chersperger, Ott grevl, Helmbich, vlrich chavfman, Heinrich muhler purger ze Steyr vnd ander biderb leut genuch. Vnd ist daz geschechen, da ergangen warn nach christes gepurde drevzehen hundert Jar, dar nach in dem Nevnzehenten Jar an Sant Katerein tag.

Source Fulltext: OÖUB 5 (Wien 1868) S. 254-255, Nr. 262