Nos Otto dei permissione Monasterij Gerstensis abbas tam presentibus quam futuris hanc inspecturis paginam protestamur, Ne in obliuionem aut desidiam apud nostros successores prelatos et fratres habeatur, quod ob salutem anime nostre et dilectionem fratrum deliberato animo et penes nos sano habito consilio dominis et fratribus nostris in oblayam octo mansiones in Nevnchirichen super Ipfa insimul positas et vnam trans anesum positam soluentes annuatim duo talenta Marie (sic) et xl denarios de quodam ligno, Item Cholomanni duo talenta, Item Martini duo talenta nulla penitus steura recipienda, quas nouem mansiones temporibus nostris aput Merswangarium conparauimus, in consolacionem libere et absolute cum omni prouentu et seruicio minuto dedimus tali modo, Ita quod ipsi fratres et domini Gerstensis cenobij de supradictis denarijs perpetuam missam cum tribus denarijs in altari Sancte Katharine omni die pro defunctis Collecta pro sacerdote et abbate dicere sint ligati, Exceptis festiuitatibus, Natiuitate domini, Pascha, Ascensione, Pentecosten, Festo corporis domini, quatuor festiuitatibus Sancte Marie et omnium sanctorum, in quibus tamen festiuitatibus cum collecta supradicta memoria fieri debet et eadem consolacio fratri ibidem porrigitur celebranti. Insuper in festo beate Margarete virginis et martiris, vt eo sollempnius per nouam hystoriam peragatur, ½ talentum et in anniuersario nostro peragendo cum vigilijs et missa conmuni talentum unum dominis disposuimus dari, supradicte autem possessiones vnaˆ cum colonis inibi positis per manus dominorum et fratrum regantur aut cui fratri hanc conmiserint officinam. In cuius rei testimonium hanc scribi fecimus litteram nostri sigilli robore consignatam. Nos vlricus prior Totusque conventus Cenobij Gerstensis presenti littera profitemur, Quod ex conmuni consensu et deliberacione fratrum et dominorum nostrorum cauta immo omni obedientia nos astrinximus et ratum habere uolumus tam nos quam successores, vt omni die una missa defunctorum in altari Sancte Katharine virginis memoriter recitetur ita, quod quicunque publicam et priorem missam in choro inofficiare septimanaliter habuerit, terciam ebdomadam ad sanctam faciat Katherinam, quemadmodum supra patet. Qui autem neglector et desidiosus huius bone memorie et execucionis repertus fuerit, eo die, quo missam neglexerit, tota careat prebenda, sequenti uero die in matta (matutina?) corrigatur et sit in aqua et pane. Quod si omnino negligatur siue obmittatur, ad manus prelati transeat possessio memorata. In cuius rei certificacionem perpetuam scripsimus hanc litteram nostri sigilli munimine confirmatam. Acta sunt hec Anno domini M°. CCC°. XX°. In die Sancti Magni confessoris.

Source Fulltext: OÖUB 5 (Wien 1868) S. 271-272, Nr. 280