Ich Johans von Chůnring Obrister Schenk in O^esterich vnd ich Liutolt sein bru^eder von Chu^enring, Wier veriehen vnd tu^en chund alle den, di disen brief an sehent oder ho^erent Lesen, di nu Lebent oder chunftich werent, Daz wier mit zeitleichem rat vnd gutlichem willen vnser Liben vrowen vrowen Agnesen vnser Liben Můter von Chůnring Greuinne von asperch vns des verainet haben, daz wier durich vnsers Liben vater Sele willen hern Liutols von Chůnring, dem got genad, vnd durich aller vnser vo^edern Sele willen dem Gotes hous ze Gaersten vnd ouch der Sammung allez daz stêêt vnd vntzebrochen wellen behalten an allen yˆrresal, daz in verschriben vnd ouch gelubt ist an vnsers Liben vater brief vnd ouch hantveste hern Liutols von Chunring, dem got genad, mit alle dem Rechten vnd di êgenant hantueste sait vnd ouch offnet, daz lob ich vorgenanter Johans vnd ich Liutolt sein bru^eder vnd vnser Libew diw êgenant vrowe Agnes mit vnsern triwen. Daz disew rede stêet vnd vntzebrochen beleybe, da vber so geb wier in disen brief zu ainem geziug vnd zu ainem offen v^erchunt diser sache, versigelt mit Meins vorgenanten Johans Insigel, wand mein bru^eder Liutolt dhainez hat, vnd mit vnser Liben vrowen vnser Mu^eter vrowen Agnesen Insigel. Der brief ist gegeben, da von Christes gebu^erd waren ergangen driuzehenhundert iar in dem zwainzigsten jar des suntages var dem ouffard tag.

Source Fulltext: OÖUB 5 (Wien 1868) S. 263, Nr. 272