Ich Chvenrat Otten Svn von Oede vnd ich Elspeth sein haus vrovwe wier veriechen paidev Offenleich an disem prief allen den, di in an sechent vnd auch ho^erent lesen, Daz wir mit wol verdachtem muet vnd mit aller vnserr erben guetleichem willen Niclan dem Stier purger ze steyr vnd seiner haus vrovwen Elspeten vnd ier paider erben ein halbev hueb datz hu^eliwarn in Tvedicher pharr geben haben vmb viertzich phvnt phenning wienner mv^enz Also beschaidenleich, Swenne wier oder vnser erben dem vorgenanten niclan dem stier purger ze steyr oder seiner haus vrovwen elspeten oder iern erben di vorgenanten viertzig phvnt phenninge wienner mv^enz an sant Michels tag hin wider geben, so schullen si vns vnser vorgenantev halb hveb wider geben, als si ê vnser was. Daz in vnd auch vns di red Stêtte vnd vnuerchert beleib, dar vber geb wier in disen gegenwrtigen Offen prief versigelt mit gotschalichs dez richter anhangvnden insigel datz steyr, der do phleger waz von des fuersten wegen von Oestereich vnd auch mit der stat anhangunden insigel ze steyr zv einer waren vrchunde dierr sache, dez sint auch gezeug di erbern leut, der nam hernach geschriben stent, her Hainreich der prevhafen, her Marichart der prevhafen, Ott der Schekch vnd di erber purger ze steyr wlfinch, Ott der chersperger, hainreich der Muchler, wernhart der sno^ede, hainreich der Tv^entzinger, Ott der grevl, helmweig, vlreich der chaufman, Ekkel der chvendler, Jacob der walich vnd ander piderber leut genueg. der prief ist geben datz Steyr, do von Christes gepuerde waren drevtzechen hvndert iar vnd dar nach in dem ainsunzwaintzigisten iar an Sand Philippstag.

Source Fulltext: OÖUB 5 (Wien 1868) S. 293-294, Nr. 302